Bæjarráð Fjallabyggðar

Á 826. fundi bæjarráðs var eftirfarandi bókað:
"Deildarstjóra tæknideildar falið að hefja undirbúning á vatnstöku í Brimnesá. Nýtt inntaksmannvirki skal geta veitt vatni inn á miðlunartank sveitafélagsins og þannig aukið til muna almenna afkastagetu til sveiflujöfnunar sem og til slökkvistarfs. Inntakið á einnig að geta tengst veitu til stórnotenda. Inntakið skal útbúið með þeim hætti að líkur á lit og óhreinindum í vatni séu lágmarkaðar með viðunandi síun, líkt og gert er í Hólsdal. Frumdrög að lausn óskast kynnt í bæjarráði innan þriggja vikna."

Með fundarboði bæjarráðs fylgdi minnisblað Eflu verkfræðistofu vegna aukinnar vatnsöflunar frá Brimnesdal.

Deildarstjóri tæknideildar lagði fram og fór yfir bókfærða stöðu áfallins viðhaldskostnaðar á árinu ásamt stöðu framkvæmda.

Með fundarboði bæjarráðs fylgdi minnisblað deildarstjóra tæknideildar þar sem óskað er eftir heimild bæjarráðs til þess að gera verðkönnun vegna verkefnisins og setja verkefnið á fjárfestingaráætlun ársins.

Búið er að endurnýja flísar á heitum pottum og fosslaug á útisvæði sundlaugarinnar á Ólafsfirði. Þegar það var gert voru einnig keyptar flísar til þess að endurnýja flísalögn á lendingarlaugum fyrir rennibrautir. Nú liggur fyrir að klára þarf verkefnið og flísaleggja lendingarlaugarnar.

Á 829. fundi bæjarráðs var farið yfir kostnað vegna snjómoksturs það sem af er vetri, samanborið við sama tímabil á síðasta ári. Eftirfarandi var bókað:
"Afgreiðslu frestað. Bæjarstjóra falið að taka saman minnisblað í samræmi við umræður á fundinum."

Með fundarboði bæjarráðs fylgdi samantekt bæjarstjóra, deildarstjóra tæknideildar og deildarstjóra stjórnsýslu- og fjármáladeildar.

Með fundarboði bæjarráðs fylgdi minnisblað deildarstjóra tæknideildar þar sem óskað er eftir heimild bæjarráðs til þess að bjóða út tímavinnu iðnaðarmanna í Fjallabyggð. Tímavinnan á við um tilfallandi verkefni sem eru undir viðmiðunarfjárhæðum vegna útboðs og verðkannana samkvæmt innkaupareglum Fjallabyggðar. Um er að ræða fimm aðskilin útboð fyrir eftirfarandi iðngreinar:
Trésmíðavinnu, rafvirkjavinnu, pípulagningavinnu, málningarvinnu og múraravinnu. Gerður verður samningur við allt að tvo bjóðendur í hverri iðngrein til eins árs með möguleika á framlengingu til eins árs í tvö skipti.

Farið var yfir fyrstu skref skv. II. kafla í vinnureglum um gerð fjárhagsáætlunar Fjallabyggðar, varðandi vinnu sem fram undan er í maí og júní nú þegar ársreikningur liggur fyrir.

Með fundarboði bæjarráðs fylgdi yfirlit launakostnaðar og kostnaðar vegna langtímaveikinda fyrir janúar-apríl 2024 lagt fram til kynningar. Áfallinn launakostnaður er 98,92% af tímabilsáætlun.

Með fundarboði bæjarráðs fylgdu drög að samningi um rekstur knattspyrnusvæða 2024 ásamt fylgiskjölum.

Með fundarboði bæjarráðs fylgdi minnisblað yfirkjörstjórnar og formanns undirkjörstjórnar á Siglufirði, dagsett 20. apríl sl., sem móttekið var þann 15. maí sl.
Í minnisblaðinu kemur fram að formaður yfirkjörstjórnar hefur í samráði við kjörstjórn og formann undirkjörstjórnar á Siglufirði lagt til, þrátt fyrir ágalla Ráðhússins, að kostir þess séu það margir að rétt sé að athuga hvort endurskoða eigi ákvörðun um að hafa kjörstað í íþróttahúsinu á Siglufirði.

Með fundarboði bæjarráðs fylgdi erindi formanns stjórnar Leyningsáss ses. ásamt fylgiskjölum, þar sem óskað er eftir auknum fjárstuðningi til stofnunarinnar vegna reksturs skíðasvæðisins í Skarðsdal. Að auki er óskað eftir því að settir verði fjármunir í þær framkvæmdir sem þarf að klára til að klára flutning á lyftum, reisa skála og hafa skíðasvæðið í lagi.

Með fundarboði bæjarráðs fylgdi umsagnarbeiðni frá Sýslumanninum á Norðurlandi eystra vegna umsóknar Sjómannafélags Ólafsfjarðar um tímabundið áfengisleyfi vegna árshátíðar sjómanna á Sjómannadaginn.

Með fundarboði bæjarráðs fylgdi erindi Tryggva Friðjónssonar formanni samninganefndar SFV í kjaramálum vegna umboðs til kjarasamningagerðar. Umboðið tekur gildi við undirritun og hefur sama gildistíma og komandi kjarasamningar.
Athygli er vakin á því að umboðið gildir einungis vegna kjarasamningsgerðar en ekki vegna stofnanasamningsgerðar.

Með fundarboði bæjarráðs fylgdi erindi Markaðsstofu Norðurlands þar sem boðað er til aðalfundar fimmtudaginn 30. maí 2024 kl. 13:00. Fundurinn verður haldinn á veitingastaðnum Verbúðin 66, Hrísey.

Allsherjar- og menntamálanefnd Alþingis sendir til umsagnar frumvarp til laga um lögræðislög (nauðungarvistanir, yfirlögráðendur o.fl.), 925. mál.
Umsagnarbeiðninni er beint bæði til sveitarfélaganna og félagsþjónustum sveitarfélaganna.
Umsagnaraðilar geta sent umsögn í gegnum umsagnagátt Alþingis.
Frestur til að senda inn umsögn er til og með 27. maí nk.

Með fundarboði bæjarráðs fylgdi fundargerð 14. fundar Svæðisskipulagsnefndar Eyjafjarðar 2022-2026, sem haldinn var þann 23. apríl sl.