Bæjarráð Fjallabyggðar

Lagt fram bréf frá sjávarútvegs- og landbúnaðarráðuneytinu varðandi umsókn um byggðakvóta fiskveiðiársins 2010/2011. Úthlutun ráðuneytisins er eftirfarandi: Siglufjörður 150 þorskígildistonn og Ólafsfjörður 58 þorskígildistonn.

Í 10. gr. laga nr. 116/2006 um stjórn fiskveiða og reglugerð frá 17. desember 2010 um úthlutun byggðakvóta til byggðarlaga og reglugerðar frá 17. desember 2010, um úthlutun byggðakvóta til fiskiskipa á fiskveiðiárinu 2010/2011 er kveðið á um það í fyrsta lagi hvaða skilyrði fiskiskip og útgerðir þeirra þurfa að uppfylla til að fá loforð um úthlutun sbr. 1. gr. og í öðru lagi hvernig að úthlutun byggðakvóta til einstakra fiskiskipa skuli staðið sbr. 4. gr. reglugerðarinnar.  Ráðuneytið leggur ríka áherslu á að byggðakvóta sé landað til vinnslu innan viðkomandi byggðarlags/sveitarfélags.  Framangreindar reglur samkvæmt reglugerð um úthlutun byggðakvóta til fiskiskipa eru almennar og gilda um úthlutun byggðakvóta til fiskiskipa í öllum byggðarlögum nema frá þeim sé vikið.

Vilji sveitarfélagið leggja til við ráðuneytið að sett verði sérstök skilyrði varðandi úthlutun byggðakvóta, skal skila inn tillögum þar að lútandi eigi síðar en 18. janúar 2011.
Bæjarráð samþykkir að vísa málum er varðar byggðakvóta til afgreiðslu bæjarstjórnar.

Lögð fram tillaga að gjaldskrá fyrir fráveitu í Fjallabyggð.

Bæjarráð samþykkir að vísa gjaldskrá fráveitu til endanlegrar afgreiðslu í bæjarstjórn.

Bæjarráð samþykkti samhljóða að taka gjaldskrá vatnsveitu á dagskrá fundarins.
Lögð fram tillaga að gjaldskrá fyrir vatnsveitu í Fjallabyggð.

Bæjarráð samþykkir að vísa gjaldskrá vatnsveitu til endanlegrar afgreiðslu í bæjarstjórn.

Tæknideild Fjallabyggðar hefur óskað eftir tilboðum í snjómokstur og hálkuvarnir í Fjallabyggð 2011 - 2013.
Verkefnið felst í hreinsun á snjó og krapa af götum, gangstígum og bifreiðastæðum ásamt snjómokstri og akstri, auk sandburðar eða saltdreifingar á götur, gangstíga og bifreiðastæði í Fjallabyggð.
Tilboðum skal skilað eigi síðar en 21. janúar 2011, kl 13:00.

Bjarkey Gunnarsdóttir og Helga Helgadóttir gagnrýndu að útboðsgögn hefðu ekki verið tekin fyrir í bæjarráði áður en útboð var auglýst.

Lögð fram tillaga að gjaldskrá fyrir gatnagerðargjöld í Fjallabyggð.

Bæjarráð samþykkir að vísa gjaldskrá til bæjarstjórnar til endanlegrar afgreiðslu í bæjarstjórn.

Drög að samþykkt um búfjárhald í Fjallabyggð voru send Sjávarútvegs- og landbúnaðarráðuneyti til samþykktar.
Ráðuneytið sendi samþykktina til baka með ábendingum til endurskoðunar.

105. fundur skipulags- og umhverfisnefndar staðfesti samþykkt um búfjárhald í Fjallabyggð með áorðnum breytingum.

Bæjarráð samþykkir áorðnar breytingar á samþykkt.

Leigjendur Hólavegar 83 Siglufirði, vilja með erindi sínu kanna hvernig gengið verði frá lóð, verði húsnæðið sem stendur á lóðinni að Hólavegi 83 rifið og einnig hvort þeir geti fengið forkaupsrétt að lóðinni með endurbyggingu í huga.

Bæjarráð felur tæknideild að koma með tillögu fyrir næsta bæjarráðsfund varðandi afgreiðslu málsins.

Dúi J. Landmark óskar eftir því í tölvuskeyti sínu að fá keypt til flutnings timburhús, í eigu sveitarfélagsins, er stendur í brekkunni fyrir neðan skíðasvæðið í Skarðsdal.
Fáist til þess leyfi skipulagsyfirvalda ætlar hann að flytja húsið á lóðina á Þormóðsgötu 20 Siglufirði.
Bæjarráð samþykkir söluheimild fyrir húsið.

Ingvar Erlingsson vék af fundi við umfjöllun þessa máls.
Fyrir liggur viðaukasamningur við ráðningu slökkviliðsstjóra Fjallabyggðar frá 1. janúar 2011.

Bæjarráð staðfestir samninginn.

Fyrir liggur ráðningarsamningur við deildarstjóra tæknideildar Fjallabyggðar.
Bæjarráð staðfestir samninginn.

Lagt fram minnisblað umhverfisfulltrúa Fjallabyggðar, um hlutverk og stöðu náttúruverndarnefnda í stjórnskipulagi sveitarfélaga.

Í nokkrum sveitarfélögum hafa náttúruverndarnefndir verið settar undir skipulags- og bygginganefndir, það fyrirkomulag stangast að hluta til á við lög.
Bæjarráð samþykkir óbreytt nefndarfyrirkomulag en beinir því til skipulags- og umhverfisnefndar að gæta vel að náttúruverndarsjónarmiðum í störfum sínum.
Bjarkey Gunnarsdóttir telur að málaflokknum sé betur komið í sérstakri umhverfisnefnd.

Lagt fram erindi frá Samtökum sveitarfélaga á Norðurlandi vestra er varðar þjónustusamning sveitarfélaga um málefni fatlaðra og er þess óskað að sveitarfélagið taki samninginn til umræðu, staðfesti hann fyrir sitt leyti og feli fulltrúa undirritun hans.
Þjónustusamningurinn sem var samþykktur á fundi stjórnar SSNV þann 15. desember s.l., inniheldur upplýsingar um skipulag þjónustunnar, þjónustuveitingu og fjármögnun.
Sveitarfélögin sem um ræðir eru Akrahreppur, Blönduósbær, Bæjarhreppur, Dalvíkurbyggð, Fjallabyggð, Húnavatnshreppur, Húnaþing vestra, Skagabyggð, Skagafjörður og Skagaströnd.

Bæjarráð samþykkir að vísa þjónustusamningi til afgreiðslu í bæjarstjórn.