Fjárhagsáætlun 2027 og þriggja ára áætlun 2028-2030

Málsnúmer 2605049

Vakta málsnúmer

Bæjarráð Fjallabyggðar - 927. fundur - 30.07.2026

Bæjarstjóri greindi frá vinnu við fjárhagsáætlun og kynnti frumdrög að rammaáætlun fyrir árið 2027 að gefnum fyrirliggjandi forsendum.
Vísað til afgreiðslu starfsmanns
Bæjarráð þakkar bæjarstjóra kynninguna á frumdrögum fjárhagsáætlunar 2027.

Bæjarráð Fjallabyggðar - 932. fundur - 10.09.2026

Fyrir liggur yfirlit um stöðu rekstrarreiknings í lok ágúst 2026 og gróf útkomuspá miðað við stöðu. Jafnframt liggur fyrir yfirlit um stöðu fjárhagsáætlunar fyrir árið 2027 miðað við mismunandi forsendur sem og yfirlit yfir hugsanlegar framkvæmdir og fjárfestingar sem þarf að fara í á næsta ári.
Vísað til gerðar fjárhagsáætlunar
Bæjarráð þakkar skrifstofustjóra fyrir framlögð gögn og mismunandi sviðsmyndir vegna breytinga á gjaldskrám.

Bæjarráð Fjallabyggðar - 933. fundur - 17.09.2026

Fyrir liggur tillaga meirihluta bæjarráðs um eftirfarandi forsendur við rammaáætlun fjárhagsáætlunar 2027:

Álagsprósenta útsvars hækki úr 14,93% í 14,97% líkt og hún er hjá þorra sveitarfélaga á Íslandi
Álagningarhlutfall fasteignaskatts, lóðarleigu, vatnsgjalds og fráveitugjalds verði óbreytt frá fyrra ári.
Almennt hækki gjaldskrár um 2,5%

Samþykkt
Með því að halda hækkun á gjaldskrá í lágmarki og töluvert undir núverandi verðbólgu og verðbólguvæntingum þá leggur Fjallabyggð sitt lóð á vogarskálarnar að ná verðbólgu niður á næstu misserum.
Bæjarráð samþykkir framlagða tillögu.

Bæjarráð Fjallabyggðar - 937. fundur - 20.10.2026

Með fundarboði fylgja drög að fjárhagsáætlun Fjallabyggðar fyrir árið 2027 og þriggja ára áætlun 2028-2030.
Vísað til afgreiðslu bæjarstjórnar
Bæjarráð þakkar skrifstofustjóra fyrir kynningu á drögum fyrir gerð fjárhagsáætlunar 2027 og þriggja ára áætlun. Bæjarráð samþykkir að vísa fyrirliggjandi drögum að fjárhagsáætlun fyrir árið 2027 og þriggja ára áætlun til fyrri umræðu í bæjarstjórn þann 22. október n.k. Lögð er áhersla á að drögin fari til umfjöllunar hjá forstöðumönnum stofnanna og viðkomandi nefnda.

Bæjarstjórn Fjallabyggðar - 277. fundur - 22.10.2026

Fjárhagsáætlun Fjallabyggðar fyrir árið 2027 og þriggja ára áætlun fyrir árin 2028-2030 er lögð fram til fyrri umræðu í bæjarstjórn. Meðfylgjandi er rammaáætlun á allar deildir.

Þórir Hákonarson, skrifstofustjóri, kynnti helstu niðurstöður úr drögum af fjárhagsáætlun fyrir árið 2027.

Fjárhagsáætlun Fjallabyggðar fyrir árið 2027 er lögð fram til fyrri umræðu ásamt þriggja ára áætlun fyrir árin 2028-2030. Fjárhagsáætlunin er sett fram í samræmi við 62. gr. sveitarstjórnarlaga, nr. 138/2011, fyrir A-hluta og samantekinn reikning fyrir A- og B-hluta. Í A-hluta er Aðalsjóður auk Þjónustumiðstöðvar og Eignasjóðs. Í B-hluta eru Veitustofnun, Hafnarsjóður og Íbúðasjóður auk hlutdeildarfélaga sem koma inn í reikningsskil sveitarfélagsins eftir hlutfallslegri ábyrgð bæjarfélagsins. Hornbrekka er ekki lengur hluti af áætlunum B-hluta. Áætlunin sýnir rekstraráætlun, áætlaðan efnahagsreikning og sjóðsstreymi fyrir sveitarfélagið og stofnanir þess.

Helstu niðurstöður fjárhagsáætlunar fyrir árið 2027 gera ráð fyrir að rekstrartekjur Fjallabyggðar nemi 4.636 m.kr. hjá samstæðunni í heild, A- og B-hluta, þar af eru rekstrartekjur A hluta áætlaðar 4.280 m.kr. Rekstrargjöld án fjármagnsliða og afskrifta eru áætluð 4.328 m.kr., þar af A-hluti 4.088 m.kr.

Framlögð áætlun byggir á eftirfarandi meginforsendum:

Útsvarsprósenta hækkar úr 14,93% í 14,97%
Hækkun útsvarstekna er áætluð 4% frá áætlun 2026 en um 5,6% hækkun frá útkomuspá fyrir árið 2026.
Álagningarhlutföll fasteignaskatta, lóðarleigu, vatns- og fráveitugjalda eru óbreytt en álagningarhlutföll voru lækkuð nokkuð á milli áranna 2025 og 2026.
Sorphirðugjöld hækka úr kr. 85.000 í kr. 87.125 eða um 2,5% en gjöldin lækkuðu verulega á milli áranna 2025 og 2026.

Gjaldskrár og þjónustugjöld Fjallabyggðar hækka að jafnaði um 2,5% frá 1. janúar en hins vegar er gert ráð fyrir því að öll innkaup til Fjallabyggðar í þjónustu og vörum hækki um 4% sem er í samræmi við verðbólguspá en verðbólga stendur nú í 6% og þarf að lækka býsna hratt til þess að þessar forsendur standi.

Varðandi launakostnað liggja forsendur nokkuð vel fyrir þar sem kjarasamningar gilda almennt út árið 2027 en rétt er að vekja athygli á því að nú stendur yfir virðismat hjá kennurum og er áætlað að bráðabirgða niðurstaða úr því mati liggi fyrir fljótlega. Niðurstaðan gæti þýtt töluverða breytingu en að líkindum þó ekki fyrr en í lok árs 2027 og hugsanlega ekki fyrr en á árinu 2028.

Afsláttur af fasteignaskatti hjá tekjulágum elli- og örorkulífeyrisþegum verður að hámarki kr. 110.000 og fylgir almennri launaþróun.
Tekjumörk fyrir afslætti hækka í samræmi við launavísitölu.

Áætlað er að frístundastyrkur fyrir börn á aldrinum 4 - 18 ára hækki í kr. 60.000 úr kr. 52.000 og með því aukin þátttaka Fjallabyggðar í íþrótta - og frístundastarfi barna og unglinga.

Rekstrarniðurstaða
Rekstrarhagnaður A- og B-hluta fyrir afskriftir og fjármagnsliði er áætlaður 308 m.kr. Afskriftir nema 274 m.kr. og fjármagnstekjur umfram fjármunagjöld 4 m.kr. Rekstrarhagnaður samstæðunnar í heild A- og B-hluta er áætlaður samtals um 38 milljónir króna.

Rekstrarhagnaður A-hluta fyrir afskriftir og fjármagnsliði er áætlaður 192 m.kr. Afskriftir nema 210 m.kr. Fjármagnstekjur umfram fjármagnsgjöld nema 30 m.kr. Rekstrarniðurstaða A-hluta sveitarsjóðs er því áætluð jákvæð um 12 milljónir króna.

Eignir og skuldir
Eignir Fjallabyggðar eru áætlaðar í árslok 2026, 6.900 m.kr., þar af eru eignir A-hluta 5.505 m.kr. Skuldir og skuldbindingar eru áætlaðar í árslok 2.881 m.kr, hefðbundnar langtímaskuldir eru aðeins 121 milljónir sem eru afar litlar skuldir í öllum samanburði en lífeyrisskuldbindingar eru hins vegar ríflega 2 milljarðar.

Eigið fé er áætlað 4.968 m.kr í árslok hjá samstæðunni og eiginfjárhlutfall 63,3%. Eigið fé A-hluta er áætlað 4.087 m.kr. Áætlunin gerir ráð fyrir að veltufé frá rekstri A-hluta verði 439m.kr. og að veltufé frá rekstri samstæðunnar A- og B-hluta verði samtals 542 m.kr.

Skuldaviðmið Fjallabyggðar samkvæmt reglugerð 502/2012 verður samkvæmt áætlun 35,8% en hámarks skuldaviðmið er 150%.

Fyrir árin á eftir er rekstrarniðurstaða samstæðunnar áætluð jákvæð fyrir árið 2028 um 140 m.kr., fyrir árið 2029 um 176 m.kr. og fyrir árið 2030 um 216 m.kr.

Gert er ráð fyrir að veltufé frá rekstri fyrir árið 2028 verði 577 m.kr., fyrir árið 2029 verði það 614 m.kr. og fyrir árið 2030 verði það 653 m.kr.

Gera má ráð fyrir breytingum á milli umræðna þegar betur liggja fyrir tillögur í fjárfestingar og hugsanlega lántöku vegna knatthúss. Ítarleg greinargerð með fjárhagsáætlun verður lögð fram tímanlega fyrir síðari umræðu í bæjarstjórn sem áætluð er 26. nóvember 2026.
Samþykkt
Bæjarstjórn samþykkir með 7 atkvæðum að vísa fyrirliggjandi tillögu að fjárhagsáætlun til síðari umræðu í bæjarstjórn og til úrvinnslu og undirbúnings á milli umræðna í nefndum og ráðum.

Fræðslu- og frístundanefnd Fjallabyggðar - 166. fundur - 27.10.2026

Fjárhagsáætlun tekin fyrir.
Samþykkt
Nefndarmenn samþykkja fyrir sitt leyti fjárhagsáætlunina og þriggja ára áætlun en óska eftir við sviðsstjóra að fá skýra greinargerð með málaflokkunum um helstu útgjaldaliði.

Framkvæmda-, hafna og veitunefnd Fjallabyggðar - 14. fundur - 28.10.2026

Fyrir liggja gögn úr drögum að fjárhagsáætlun fyrir árið 2027 í málaflokkum er nefndin hefur til umfjöllunar.
Samþykkt
Nefndin samþykkir fyrirliggjandi gögn að drögum að fjárhagsáætlun fyrir árið 2027 fyrir síðari umræðu í bæjarstjórn.

Öldungaráð Fjallabyggðar - 12. fundur - 03.11.2026

Fjárhagsáætlun vegna öldungaráðs 2027
Lagt fram til kynningar
Nefndarmenn lýsa ánægju með fjárhagsáætlunina fyrir árið 2027.

Stýrihópur Heilsueflandi samfélags - 37. fundur - 03.11.2026

Staðan 2026 og fjárhagsáætlun vegna ársins 2027 Stýrihóps um heilsueflandi samfélag.
Samþykkt
Nefndarmenn samþykkja framlagða fjárhagsáætlun vegna stýrihópsins fyrir sitt leyti.