Bæjarráð Fjallabyggðar

447. fundur 01. júní 2016 kl. 12:00 í Ráðhúsi Fjallabyggðar, Gránugötu 24, Siglufirði
Nefndarmenn
  • Steinunn María Sveinsdóttir formaður, S lista
  • Kristinn Kristjánsson varaformaður, F lista
  • Helga Helgadóttir aðalmaður, D lista
  • Sólrún Júlíusdóttir áheyrnarfulltrúi, B lista
  • Gunnar Ingi Birgisson bæjarstjóri
  • Ólafur Þór Ólafsson deildarstjóri stjórnsýslu og fjármála
Fundargerð ritaði: Ólafur Þór Ólafsson deildarstjóri stjórnsýslu og fjármála

1.Trúnaðarmál - Starfsmannamál

Málsnúmer 1603090Vakta málsnúmer

Undir þessum dagskrárlið vék Helga Helgadóttir af fundi. Í hennar stað kom S. Guðrún Hauksdóttir.
Á fund bæjarráðs kom deildarstjóri fræðslu- frístunda- og menningarmála, Kristinn J. Reimarsson.

Niðurstaða bæjarráðs er skráð sem trúnaðarmál.

2.Skólamáltíðir

Málsnúmer 1604082Vakta málsnúmer

Á 444. fundi bæjarráðs, 10. maí 2016, var samþykkt að gerð yrði verðkönnun vegna skólamáltíða og deildarstjóra fræðslu- frístunda- og menningarmála falið að leggja fyrir bæjarráð tillögu að útboðsgögnum.

Verðkönnunardrög vegna skólamáltíða fyrir Grunnskóla Fjallabyggðar 2016 - 2018, lögð fyrir bæjarráð.
Annars vegar er um að ræða verðkönnun vegna skólamáltíða fyrir nemendur staðsetta að Norðurgötu 10 Siglufirði og hins vegar verðkönnun vegna skólamáltíða fyrir nemendur staðsetta að Tjarnarstíg 3 Ólafsfirði.

Bæjarráð samþykkir verðkönnunardrög með áorðnum breytingum og felur deildarstjóra fræðslu- frístunda- og menningarmála framkvæmd verðkönnunar.

3.Styrkir vegna námsupplýsingakerfis

Málsnúmer 1605025Vakta málsnúmer

Á 445. fundi bæjarráðs, 18. maí 2016, var lagt fram erindi frá Mennta- og menningarmálaráðuneytinu, dagsett 4. maí 2016, þar sem óskað er eftir upplýsingum um nýtingu styrks til uppfærslu námsupplýsingakerfis grunnskóla.
Bæjarráð óskaði eftir umsögn deildarstjóra fræðslu- frístunda- og menningarmála.

Umsögn lögð fram.
Þar kemur m.a. fram að Fjallabyggð fékk 190.000 kr. í styrk sem var nýttur til að kaupa uppfærslu á MENTOR eða viðbótina sem var sérstaklega hönnuð til að sinna nýju matskerfi.

4.Almenningssamgöngur milli byggðakjarna

Málsnúmer 1505058Vakta málsnúmer

Lagt fram minnisblað deildarstjóra fræðslu- frístunda- og menningarmála, dagsett 25. maí 2016, um nýtingu ferða milli byggðakjarna í Fjallabyggð.

Bæjarráð samþykkir að fargjald verði ekki rukkað vegna rútuferða á vegum bæjarfélagsins milli byggðakjarna.

Bæjarráð samþykkir að fela deildarstjóra fræðslu- frístunda- og menningarmála að leggja fyrir bæjarráð í haust tillögu að betri nýtingu á ferðum milli bæjarkjarna m.a. með tilliti til tímasetninga.

5.Aðstaða í íþróttahúsinu á Siglufirði

Málsnúmer 1603145Vakta málsnúmer

Á 439. fundi bæjarráðs, 5. apríl 2016, var tekið fyrir erindi Óskars Þórðarsonar, dagsett 30. mars 2016, varðandi betrumbót á aðstöðu í íþróttahúsinu á Siglufirði til körfuknattleiksæfinga fyrir börn á grunnskólaaldri.

Bæjarráð samþykkti að óskar eftir umsögn deildarstjóra fræðslu- frístunda- og menningarmála á erindinu.

Umsögn lögð fram.

Bæjarráð samþykkir að fela íþrótta- og tómastundafulltrúa að láta lagfæra fyrirliggjandi körfuspjöld og bæta við kennslutækjum.
Kaup á nýjum körfuspjöldum með rafmagnsmótor er vísað til gerðar fjárhagsáætlunar.

6.Styrkumsóknir 2016 - Fasteignaskattur félagasamtaka

Málsnúmer 1510022Vakta málsnúmer

Á 439. fundi bæjarráðs, 5. apríl 2016, voru lagðar fram til kynningar umsóknir félaga og félagasamtaka
um styrki til greiðslu fasteignaskatts.
Samtals voru upphæðir fasteignaskatts sem tengdust umsóknum kr. 3.031.122.
Bæjarráð frestaði afgreiðslu málsins, þar sem nánari upplýsingar vantaði frá nokkrum umsækjendum.

Lagt fram minnisblað deildarstjóra fjármála og stjórnsýslu.

Bæjarráð samþykkir umsóknir félaga og félagasamtaka að upphæð kr. 2.381.480

Umsókn Sigurhæða ses er vísað til næsta fundar bæjarráðs, þar sem umfjöllun um málefni félagsins verða til umræðu.

7.Trúnaðarmál - íbúðarmál

Málsnúmer 1605080Vakta málsnúmer

Niðurstaða bæjarráðs er skráð sem trúnaðarmál.

8.Rekstraryfirlit apríl 2016

Málsnúmer 1605075Vakta málsnúmer

Rekstrarniðurstaða Fjallabyggðar fyrir janúar til apríl, 2016, er 9,6 milljónum betri en tímabilsáætlun gerir ráð fyrir, 39,5 millj. í tekjur umfram gjöld, í stað 29,9 millj. Tekjur eru 2,3 millj. hærri en áætlun, gjöld 8,1 millj. hærri og fjármagnsliðir 15,4 millj. lægri.

9.Umsókn um framkvæmdaleyfi

Málsnúmer 1605087Vakta málsnúmer

Tekin fyrir beiðni tæknifulltrúa Tæknideildar Fjallabyggðar, Andra Þórs Andréssonar, um framkvæmdaleyfi vegna framkvæmda við fráveituútrásir við enda Aðalgötu á Siglufirði (L=155m) og hinsvegar fráveituútrásir við grjótgarð við Ólafsfjarðarhöfn (L=60m)

Bæjarráð samþykkir umbeðið framkvæmdaleyfi.

10.Ályktun ársþings UÍF

Málsnúmer 1605073Vakta málsnúmer

Lögð fram til kynningar ályktun ársþings Ungmenna- og íþróttasambands Fjallabyggðar frá 19. maí 2016.

"Ársþing UÍF hvetur Fjallabyggð til að verða heilsueflandi samfélag í samstarfi við embætti Landlæknis. Heilsueflandi samfélag miðar að því að þróa samfélagslegan ramma utan um markvissa og heildræna heilsueflingu allra aldurhópa. Í þeim tilgangi eru lagðir til grundvallar fjórir áhrifaþættir heilbrigðis sem unnið er með, þ.e. næring, hreyfing, geðrækt og lífsgæði.
Fjallabyggð bætist þá í hóp þeirra sveitarfélaga sem skuldbinda sig til þess að efla lýðheilsu og lífsgæði íbúa sinna á markvissan hátt".

Bæjarráð samþykkir að vísa ályktuninni til umfjöllunar í fræðslu- og frístundanefnd.

11.Unglingalandsmót UMFÍ 2019

Málsnúmer 1605070Vakta málsnúmer

Ungmennafélag Íslands óskar eftir umsóknum frá sambandsaðilum og sveitarstjórnum um að taka að sér undirbúning og framkvæmd 22. Unglingalandsmóts UMFÍ sem haldið verður 2019.

Lagt fram til kynningar.

12.Málefni Leyningsáss ses.

Málsnúmer 1206038Vakta málsnúmer

Lagt fram erindi Leyningsáss ses., dagsett 19. maí 2016, þar sem óskað er eftir viðræðum við Fjallabyggð um annarsvegar aðgerðir til að fyrirbyggja frekara tjón á nýjum golfvelli í Hólsdal vegna lausagöngu sauðfjár og hinsvegar lokun malarvegar inn á vallarsvæðið við Skarðsveg fyrir almennri umferð vélknúinna ökutækja.

Bæjarráð felur bæjarstjóra að svara erindinu.

13.Ársreikningur og ársskýrsla 2015 - Síldarminjasafn Íslands

Málsnúmer 1605074Vakta málsnúmer

Lagt fram til kynningar ársreikningur og ársskýrsla Síldarminjasafns Íslands ses fyrir árið 2015.

14.Ofrukkaður fasteignaskattur

Málsnúmer 1605063Vakta málsnúmer

Undir þessum lið vék Steinunn María Sveinsdóttir af fundi.
Lagt fram erindi Síldarminjasafns Íslands, dagsett 17. maí 2016 er varðar fasteignaskatt.
Óskað er eftir því að álagning fasteignaskatts á árunum 2006 til 2016 verði endurskoðuð.

Bæjarráð óskar umsagnar bæjarstjóra og deildarstjóra stjórnsýslu og fjármála.

15.Fundur um stöðu viðræðna við Sjúkratryggingar Íslands um þjónustusamninga fyrir hjúkrunarheimili

Málsnúmer 1605086Vakta málsnúmer

Lagt fram til kynningar erindi frá Sambandi íslenskra sveitarfélaga þar sem bæjarfélaginu er boðið að taka þátt í fundi 3. júní n.k. í Reykjavík, þar sem fundarefnið er staða viðræðna við Sjúkratryggingar Íslands um þjónustusamninga fyrir hjúkrunarheimili.

16.Fundargerðir Samtaka sjávarútvegssveitarfélaga - 2016

Málsnúmer 1601006Vakta málsnúmer

Lögð fram til kynningar fundargerð 27. fundar stjórnar Samtaka sjávarútvegssveitarfélaga frá 17. maí 2017.

17.Fundargerðir stjórnar Hornbrekku - 2016

Málsnúmer 1601011Vakta málsnúmer

Eftirfarandi fundargerðir lagðar fram til kynningar.

4. fundur stjórnar Hornbrekku 10. maí 2016.

18.Fundargerðir nefnda og stjórna Fjallabyggðar - 2016

Málsnúmer 1601013Vakta málsnúmer

Lögð fram til kynningar eftirfarandi fundargerð:

28. fundur yfirkjörstjórnar frá 28. maí 2016.

Fundi slitið.