Bæjarráð Fjallabyggðar

Lagt fram bréf frá 28. febrúar 2011, undirritað af Brynju Ingunni Hafsteinsdóttur og Margréti St. Þórðardóttur.

Fram kemur í bréfinu m.a. að landeigendur að Siglunesi 4,5, og 6 mótmæla harðlega ákvörðun skipulags - og umhverfisnefndar Fjallabyggðar frá 14. febrúar sl. þar sem nefndin veitti heimild til grjóttínslu úr landi Vélsmiðju Hjalta Einarssonar, til sjóvarna.

Lagt fram til kynningar.
Bæjarráð vísar málinu til umsagnar lögmanns sveitarfélagsins og fagnefndar.

Lagt fram minnisblað frá Karítas Skarphéðinsdóttur Neff, fræðslu- og menningarfulltrúa um húsnæðismál fyrir fullorðinsfræðslu á vegum Símeyjar.

Bæjarráð leggur til við bæjarstjórn að Símey fái inni í skólahúsnæði bæjarfélagsins á Ólafsfirði og á Siglufirði með sína starfsemi sem áður var til húsa í fyrrum húsnæði gagnfræðaskólans á Ólafsfirði.
Fræðslu- og menningarfulltrúa er falið að sjá um afgreiðslu málsins.

Lagt fram minnisblað frá Karítas Skarphéðinsdóttur Neff, fræðslu- og menningarfulltrúa um m.a. drög að samningi frá Margvís ehf. vegna íslenskukennslu fyrir útlendinga.

Fjallabyggð leggur til kennslu- og starfsaðstöðu fyrir kennara og greiðir akstur á milli Akureyrar og Siglufjarðar.

Fræðslunefnd telur mikilvægt að nemendur fái kennslu í sinni heimabyggð og telur brýnt að sveitarfélagið leggi til umrædda aðstöðu til íslenskukennslu fyrir útlendinga.

Fræðslunefnd telur og rétt að Símey taki að sér þau verkefni sem áður voru vistuð hjá Farskólanum.

Bæjarráð leggur til við bæjarstjórn að veittur verði styrkur úr bæjarsjóði til að standa undir húsaleigugreiðslum fyrir umrædd námskeið.

Áætlaður kostnaður fyrir eitt námskeið er kr. 46.500.-

Lagt fram minnisblað frá félagsmálastjóra dags. 03.03.2011 er tekur á þörf fyrir upplýsingakerfi fyrir félagsþjónustuna.

Kerfið er til skráningar og skýrslugerðar fatlaðra og í barnaverndarmálum.

Bæjarfélagið hefur nú þegar samið við OneSystem um skjalakerfi og er hér um að ræða tilboðsverð í viðbætur við það kerfi.

Bæjarráð leggur til við bæjarstjórn að samþykkja breytingu á fjárhagsáætlun fyrir málaflokk félagsþjónustunnar vegna stofnkostnaðar að upphæð kr. 426.700.- og þjónustugjald á ári kr. 328.203.-

Lagðar fram tillögur um akstursgreiðslur fyrir skólastofnanir Fjallabyggðar en um er að ræða skólastjórnendur leikskóla, tónskóla og grunnskóla.

Bæjarráð telur rétt að umræddar tillögur verði samþykktar.

Bæjarráð samþykkti að auglýsa Kirkjuveg 4, Ólafsfirði til sölu á 188. fundi sínum 26. október s.l.
Ekki hefur tekist að selja eignina og samþykkir bæjarráð því nú að óska tilskilinna leyfa til að rífa húsið.
Jafnframt að leitað verði tilboða í niðurrif og frágang á umræddri lóð og upplýsingum frá tæknideild um förgunarkostnað.

Lagðar fram upplýsingar um niðurstöður verðkönnunar meðal fasteignasala. Um er að ræða íbúðir sem bæjarfélagið er tilbúið til að selja fáist viðunandi tilboð.

Bæjarráð samþykkir að fela Hvammi fasteignasölu, sölu og gerð verðmats.

Borist hefur eitt tilboð í húseignina Hólaveg 83 á Siglufirði, frá Önnu Maríu Björnsdóttur og Óskari Þórðarsyni.

Bæjarráð samþykkir að fela bæjarstjóra að ræða við bjóðendur.

Jón Helgi Ingimarsson hefur fest kaup á fjölnota bíl sem hentar m.a. til að þjónusta Fjallabyggð. Nefnir hann m.a. félagsþjónustu, skóla og fleira.

Auk þess er hann tilbúinn til að kaupa bifreið Fjallabyggðar sem er sambærileg og er tilbúinn að bjóða í allan akstur á vegum bæjarfélagsins.

Bæjarráð telur rétt að kanna málið og óskar eftir umsögn fræðslu- og félagsmálanefndar um þörf og fyrirkomulag aksturs.
Verði það niðurstaðan að kaupa akstursþjónustu þá verði um útboð að ræða.

Lagt fram bréf bæjarstjóra dags. 3.03.2011 um uppgjör á milli sveitarfélaga við Eyjafjörð og ríkis um endurbyggingu og breytingum á húsnæði fyrir Menntaskólann á Tröllaskaga.

Lagt fram til kynningar.

Bæjarráð óskar eftir fullnaðarumboði bæjarstjórnar til að ganga frá kjörskrá vegna þjóðaratkvæðagreiðslu 9. apríl 2011.

Einnig fullnaðarumboði til að úrskurða um athugasemdir sem kunna að berast.

Bæjarráð leggur til við bæjarstjórn að kjörstaðir verði tveir þ.e. í Tjarnarborg Ólafsfirði og í ráðhúsinu á Siglufirði. 

Bæjarráð leggur einnig til að kjörstaðir verði opnir frá kl. 10.00 til 20.00.

Atkvæðagreiðsla utan kjörfundar mun hefjast 16. mars. 2011.

Foreldrar barna í Ólafsfirði sem fædd eru árið 2002, óska eftir því að bæjaryfirvöld mótmæli harðlega við þar til bæra aðila, þeim breytingum er gerðar voru á reglugerð um hollustuhætti á sundstöðum. Ný reglugerð, 14. gr. 814/2010 mismunar að þeirra mati þeim einstaklingum er gátu farið í sund án fylgdar árið 2010.
Bæjarráð samþykkir að leita umsagnar frístundanefndar.

Fundargerð 4. og 5. fundar lagðar fram til kynningar.

Fundargerð 3. fundar lögð fram til kynningar.

Lögð fram til kynningar tilkynning frá Sambandi íslenskra sveitarfélaga um að XXV. landsþing sambandsins verði haldið föstudaginn 25. mars 2011 í Reykjavík.

Tekið fyrir bréf frá Lánasjóði sveitarfélaga, dagsett þann 23. febrúar 2011, þar sem auglýst er eftir framboðum í stjórn Lánasjóðs sveitarfélaga. Kjörnefnd, sem skipuð hefur verið til undirbúnings kjörs stjórnar og varastjórnar, óskar eftir að sveitarstjórnarmönnum sé kynnt innihald bréfs þessa eins fljótt og unnt er til að þeim gefist tími til að skila inn framboðum.

Fundargerð lögð fram til kynningar.