Viðbygging við Leikskála formlega tekin í notkun

Fjöldi foreldra og gesta mætti við athöfnina
Fjöldi foreldra og gesta mætti við athöfnina

Í gær, fimmtudaginn 3. nóvember, var formlega tekin í notkun viðbygging við leikskólann Leikskála á Siglufirði.

Ávarp fluttu Olga Gísladóttir leikskólastjóri, Gunnar I. Birgisson bæjarstjóri og Steinunn María Sveinsdóttir formaður bæjarráðs.
Börn á elstu deild leikskólans sungu tvö lög og svo sáu börnin með aðstoð Steinunnar um að klippa á borða sem tákn um formlega opnun húsnæðisins.
Af þessu tilefni bárust leikskólanum nokkrar gjafir;
- Kvenfélagið Von gaf flettisófa, 6 matarstóla, myndavél og ipad.
- Bettýarsjóður gaf 450.000 krónur til leikfangakaupa og
- foreldrafélag Leikskála  gaf flettisófa og hitamæli.
Eftir að búið var að klippa á borða var börnum, starfsfólki og foreldrum boðið upp á kaffiveitingar og skoðun á hinu nýja rými.

Skólinn er nú fimm deilda leikskóli með rúmlega 70 börn.

Laugardaginn 12. nóvember verður leikskólinn opinn frá klukkan 13:00-16:00. Þá gefst fólki kostur á að skoða húsnæði leikskólans.

Í byrjun febrúar 2016 sl. var samið við Berg ehf um að taka að sér verkið sem fólst í að byggja við núverandi leikskóla tvær leikskóladeildir, samtals 267 m2 og gera breytingar i eldra húsnæði sem fólust í endurbótum á starfsmannaaðstöðu og uppsetningu á loftræstikerfi fyrir allt húsið.
Kostnaðaráætlun hljóðaði upp á 122.519.995 kr. Í útboði var gert ráð fyrir að verkið myndi klárast fyrir opnun skólans í ágúst eða eftir sumarfrí. Berg ehf skilaði inn frávikstilboði upp á 127.551.000 kr. miðað við skil á verki þann 10. október sem er 104,1% af kostn.áætlun.

Hönnuðir að húsnæðinu voru Ævar Harðarson arkitekt og Mannvit ehf verkfræðihönnun

Eftirtaldir verktakar komu að verkinu:

Aðalverktaki: Berg ehf. Siglufirði
Undirverktakar:
-Bás ehf steypusala og jarðvinna. Siglufirði
-Tréverk ehf uppsteypa með Berg. Dalvík
-JVB ehf pípulagnir. Ólafsfirði
-Andrés Stefánsson raflagnir. Siglufirði
-Blikkrás loftræsting. Akureyri
-Málaraverkstæðið málningarvinna. Siglufirði
-Múriðn ehf múrvinna og flísalögn. Akureyri
-Klemenz ehf dúklagning. Akureyri
-JE vélaverkstæði ehf stálvirki í þak. Siglufirði
-SR vélaverkstæði járnsmíði og steinsögun. Siglufirði
-Ingvi Óskarsson ehf steinborun. Ólafsfirði
-Höfuðverk ehf þakpappavinna. Reykjavík
-L/7 ehf gólfílögn. Siglufirði
-Efla ehf þjöppupróf.
-Ölur ehf innréttingar. Akureyri
-Byko ehf gluggar og hurðir. Akureyri

Leikskólabörn sungu við athöfnina
Börn af elstu deild leikskólans sungu fyrir gesti

Frá vígslu viðbyggingar við Leikskála
Leikskólabörn bíða spennt eftir að vígsla hefjist.

Vígsluterta
Boðið var upp á þessa fínu tertu að lokinni athöfn.