Styrkir menntamálaráðuneytis til mótvægisaðgerða vegna tímabundins aflasamdráttar

Menntamálaráðherra hefur ákveðið að veita allt að 180 m.kr. til menntaverkefna á landsbyggðinni sem eru þáttur í mótvægisaðgerðum ríkisstjórnarinnar vegna tímabundins aflasamdráttar.

Menntamálaráðherra hefur ákveðið að veita allt að 180 m.kr. til menntaverkefna á landsbyggðinni sem eru þáttur í mótvægisaðgerðum ríkisstjórnarinnar vegna tímabundins aflasamdráttar. Veittir verða styrkir til 59 verkefna að þessu sinni.

Við undirbúning styrkveitinga voru símenntunarmiðstöðvar og framhaldsskólar á landsbyggðinni skilgreind sem samstarfsaðilar verkefna sem undirbúin voru í samráði við hagsmunaðila á viðkomandi svæði (stéttarfélög, fyrirtæki og sveitarfélög). Áhersla var lögð á að styrkja menntunarverkefni sem væru til þess fallin að mæta afleiðingum samdráttar í fiskveiðum og fiskvinnslu.

Menntamálaráðuneyti hafði samráð við iðnaðarráðuneyti sem gekkst fyrir greiningu Byggðastofnunar á afleiðingum aflasamdráttar eftir sveitarfélögum um land allt. Jafnframt var ákveðið að leggja sérstaka áherslu á þróunarverkefni til lengri tíma í Vestmannaeyjum og á Höfn í Hornafirði í samstarfi við Nýsköpunarmiðstöð Íslands.

Heildarupphæð styrkja sem ákveðnir hafa verið skiptist þannig á milli svæða.

Suðurnes

20.2 m.kr.

Vesturland

16.6 m.kr.

Vestfirðir

24.2 m.kr.

Norðurland vestra

12.0 m.kr.

Eyjafjörður

5.3 m.kr.

Þingeyjarsýsla

12.0 m.kr.

Austurland

24.9 m.kr.

Hornafjörður

25.0 m.kr.

Suðurland (Þorlákshöfn)

10.2 m.kr.

Vestmannaeyjar

29.0 m.kr.

Styrkveitingar eru að hluta til háðar framvindu verkefna og þátttöku í þeim. Jafnframt mun menntamálaráðuneyti fylgjast með framkvæmd verkefna, meta möguleika á yfirfærslu vel heppnaðra aðgerða og stuðla að samstarfi milli landshluta.