Flugvallarsvæðið á Siglufirði

Málsnúmer 2602059

Bæjarráð Fjallabyggðar - 911. fundur - 05.03.2026

Fram hafa komið hugmyndir nú um framtíðaruppbyggingu á svæðinu.

Vísað til afgreiðslu starfsmanns

Bæjarstjóra falið að vinna málið áfram og leita frekari upplýsinga.

Bæjarráð Fjallabyggðar - 914. fundur - 30.03.2026

Í kjölfar auglýsingar um hugmyndir varðandi nýtingu fasteigna í eigu Fjallabyggðar á flugvallarsvæðinu á Siglufirði liggja fyrir þrjár grófar hugmyndir að framtíðarnýtingu.
Viking Heliskiing lýsir áhuga á að kaupa eignir Fjallabyggðar og gera svæðið að lykilinnviði í áframhaldandi uppbyggingu ferðaþjónustu á Tröllaskaga og í Fjallabyggð með starfsemi fyrirtækisins á sviði þyrluþjónustu í huga.
Georg Páll Kristinsson lýsir yfir áhuga á nýtingu svæðisins og fasteigna í rekstur með vistvænum brennsluofni.
Þriðja hugmyndin er almenn og snýr að nýtingu svæðisins og fasteigna fyrir ýmis konar samkomur, tónleikahald, listsýningar og fleira.

Samþykkt

Bæjarráð samþykkir að ganga til viðræðna við Viking Heliskiing um mögulega framtíðaruppbyggingu á flugvallarsvæðinu á Siglufirði og kaup á eignum Fjallabyggðar á svæðinu enda samræmast hugmyndir fyrirtækisins tillögum starfshóps um framtíðaruppbyggingu flugvallarsvæðisins frá árinu 2022.

Bæjarráð Fjallabyggðar - 917. fundur - 27.04.2026

Fyrir liggja erindi frá annars vegar Kristínu Lárusdóttur og hins vegar frá Samúel Hansen f.h. íbúa austan fjarðar á Siglufirði vegna þyrluumferðar og umsvifa við flugvöllinn þar sem lýst er áhyggjum vegna hljóðmengunar og fleira.

Vísað til afgreiðslu starfsmanns

Bæjarráð þakkar Kristínu Lárusdóttur og Samúel Hansen, f.h. íbúa austan fjarðar, fyrir erindi þeirra vegna Siglufjarðarflugvallar og þyrluflugs. Bæjarráð tekur undir ábendingar og áhyggjur íbúa um val á flugleiðum og flughæðir - það hljóti í góðu samstarfi og samtali að vera hægt að finna verklag þar sem tekið er tillit til allra hagaðila. Bæjarráð minnir hins vegar á að loftferðir hvers konar liggja utan valdheimilda sveitarfélaga og því ekki á verksviði sveitarfélaga að setja reglur um þær með beinum hætti. Bæjarráð felur hins vegar bæjarstjóra að kanna með hvaða hætti Fjallabyggð getur sett reglur um lágflug t.d. yfir frístundabyggðum, íbúasvæðum sem og griðlöndum fugla.
Bæjarráð vil enn fremur minna á að flugvallarsvæðið á Siglufirði er skipulagt sem flugvöllur og hafi verið um langa hríð. Að lokum vill bæjarráð leggja áherslu á að ekki liggja fyrir drög að neinu samkomulagi um sölu eigna á flugvallarsvæðinu.

Bæjarráð Fjallabyggðar - 918. fundur - 07.05.2026

Á fundinn mættu fulltrúar Viking Heliskiing ehf., Björgvin Björgvinsson og Jóhann H Hafstein, til þess að gera grein fyrir starfseminni undanfarnar vikur og fara yfir þær athugasemdir sem borist hafa Fjallabyggð auk þess að greina frá hugmyndum um uppbyggingu á flugvallarsvæðinu á Siglufirði.

Vísað til afgreiðslu starfsmanns

Bæjarráð þakkar Björgvin og Jóhanni fyrir góða yfirferð á starfseminni en fram kemur að aðstæður í vor hafa verið með endemum góðar fyrir starfsemina sem hefur þá komið fram í mikilli þyrluumferð. Lögðu þeir áherslu á að fyrirtækið starfi eftir lögum og reglugerðum um loftför og munu eftir sem áður leggja sig í laupa við að sambúð við bæjarbúa verði með sem allra besta móti. Bæjarráð tekur þessu fagnandi og brýnir fyrir forsvarsmönnum fyrirtækisins að tillitssemi og umburðarlyndi verði áfram höfð að leiðarljósi. Framkvæmdasviði er falið að kanna hvers konar umgjörð væri hægt sé að útbúa um þyrluumferð og starfsemi þeirra í Fjallabyggð í samráði við lögmann sveitarfélagsins, íbúa og fulltrúa fyrirtækisins, þannig að bæði íbúar og atvinnustarfssemin njóti góðs af.

Bæjarráð þakkar þá einnig Viking Heliskiing fyrir framlagt minnisblað um fyrirætlanir fyrirtækisins á flugvallarsvæðinu. Bæjarráð telur eðlilegan lýðræðislegan farveg fyrir þau heildar áform sem lögð hafa verið fram að svæðið í kringum núverandi flugvallarbyggingar verði deiliskipulagt. Í því ferli gæfist íbúum og öðrum tækifæri til þess að koma sínum athugasemdum á framfæri. Bæjarráði hugnast engu að síður vel þau áform sem kynnt hafa verið um notkun núverandi mannvirkja og uppfylla þau markmið bæjarstjórnar um nýtingu fasteigna á flugvallarsvæðinu til uppbyggingar á atvinnustarfsemi. Bæjarstjóra er falið að halda áfram samningaviðræðum við fyrirtækið um nýtingu þeirra og leggja fyrir bæjarstjórn til samþykktar.