Bæjarráð Fjallabyggðar

Bæjarráð þakkar framkomið erindi deildarstjóra fræðslu-, frístunda- og menningarmála og felur bæjarstjóra og deildarstjórum að koma með tillögur að breytingum á erindisbréfum nefnda á vegum sveitarfélagsins.

Bæjarráð samþykkir framlagðan viðauka nr. 16/2022 við fjárhagsáætlun 2022 að fjárhæð kr. 1.000.000,- vegna skipulagsvinnu við athafnasvæði Ólafsfirði, sem mætt verður með lækkun á handbæru fé.

Bæjarráð ítrekar óskir sínar um umsagnir og felur bæjarstjóra að hafa samband við forsvarsmenn Stangveiðifélags Siglufjarðar og Valló ehf. og kalla eftir umsögn þeirra um þann samning sem gilt hefur um veiðistjórn og veiðivernd í Hólsá og Leyningsá.

Bæjarráð gerir ekki athugasemdir við beiðni SSNE og felur bæjarstjóra að afgreiða málið.

Helgi Jóhannsson aðalmaður H-lista lagði fram eftirfarandi bókun:
Núna rétt um ári eftir að SSNE opnaði stafsstöð að Ólafsvegi 4 í Ólafsfirði er það ósk starfsmannsins að flytja stafsstöðina í MTR þar sem er lifandi vinnusamfélag og um leið mikilvæg tenging við samfélagið. Undirritaður gerir ekki athugasemd við beiðnina og telur hana skiljanlega. Eins ánægjulegt og mikilvægt það er að hafa starfsstöð SSNE á svæðinu þá mistókst sveitarfélaginu að skapa þá umgjörð sem þurfti til að byggja undir þessa starfsemi að Ólafsvegi 4. Þessu hafði undirritaður varað við frá upphafi og er nú að raungerast með þessum flutningi. Ég vona að Fjallabyggð skoði nú í alvöru möguleika á samvinnu við MTR um hugmyndir að Tröllaskagasetri sem skólinn hafði frumkvæði að í nóvember 2021.

Á fund bæjarráðs mætti Frosti Ólafsson f.h. Olís. Bæjarráð þakkar Frosta fyrir komuna og þær upplýsingar sem komu fram á fundinum.
Bæjarráð ítrekar óánægju sína með lokun þjónustustöðvar Olís í Ólafsfirði og hvetur Olís til þess að flýta eftir fremsta megni að koma á samstarfi við áhugasama aðila um rekstur stöðvarinnar og leggja sitt af mörkum svo að skerðingu þjónustu sé haldið í lágmarki.