Starfsmannahald og rekstur Fjallabyggðahafna

Fyrir liggur minnisblað frá bæjarstjóra um starfsmannahald og rekstur Fjallabyggðahafna og tillaga að úrlausn þegar yfirhafnarvörður lætur af störfum 31.janúar n.k.

Fyrir liggur minnisblað og tillaga um úrlausn varðandi mönnun Fjallabyggðahafna en málinu var vísað til hafnarstjórnar af bæjarráði.

Hafnarstjóri greindi frá því að tveir aðilar hefðu sýnt því áhuga að sinna þeim verkefnum hafnarinnar sem auglýst var eftir, þ.e. Síldarminjasafnið og FMS.

Fyrir liggur samkomulag við Síldarminjasafnið vegna vöktunar skemmtiferðaskipa sumarið 2025. Starfsmenn safnsins hafa lokið tilskyldum námskeiðum vegna þessa og samkomulag er staðfest af safnstjóra.

Enn er beðið viðbragða frá Fiskistofu og HMS á umsókn um undanþágu á leyfi til vigtunar fyrir aðra starfsmenn en starfsmenn hafnarinnar og þegar þau mál skýrast verða drög að samkomulagi við FMS um verkefni við höfnina kynnt í nýrri framkvæmda-,veitu- og hafnarnefnd.

Hafnarstjóri fór yfir rekstrarstöðu hafnarsjóðs miðað við fyrstu 7 mánuði ársins og greindi jafnframt frá því að Leno H Passaro hefur sagt starfi sínu lausu sem hafnarvörður Fjallabyggðar.

Hafnarstjóri lagði fram vinnuskjal um tímabundið fyrirkomulag starfsmannahalds við Fjallabyggðarhöfn. Rekstrarafkoma hafnarinnar hefur versnað verulega á síðustu árum, tekjur hafa minnkað á meðan kostnaður hefur aukist. Rekstrarafkoma ársins 2024 var aðeins um 20% af því sem hún var árið 2019. Gera má ráð fyrir enn meiri samdrætti á næstu árum standist sú áætlun að komur skemmtiferðaskipa muni fækka um 65-70% á milli áranna 2025 og 2026.

Fyrir liggur greinargerð og tillaga hafnarstjóra um skipulag starfsmannahalds og rekstur Fjallabyggðarhafna. Gert er ráð fyrir því í tillögu að auglýst verði starf hafnarvarðar og gert ráð fyrir að viðkomandi geti hafið störf eigi síðar en 1. janúar n.k. Jafnframt er gert ráð fyrir því að samningur við FMS verði útvíkkaður út árið 2026 og sinni starfsmenn FMS ýmsum störfum sem falla til eftir álagi hverju sinni.