Bæjarráð Fjallabyggðar

940. fundur 12. nóvember 2026 kl. 11:00 - 13:00 í fjarfundi
Nefndarmenn
  • Helgi Jóhannsson formaður
  • Jóhann K. Jóhannsson varaformaður
  • Tómas Atli Einarsson aðalfulltrúi
Starfsmenn
  • Hafdís Huld Björnsdóttir bæjarstjóri
  • Þórir Hákonarson skrifstofustjóri
Fundargerð ritaði: Þórir Hákonarson Skrifstofustjóri

1.Álagningarreglur fasteignagjalda 2027

Málsnúmer 2610085Vakta málsnúmer

Fyrir liggur tillaga að álagningarreglum fasteignagjalda fyrir árið 2027 en gert er ráð fyrir óbreyttum álagningarreglum frá árinu 2026 að því undanskildu að sorphirðugjöld hækka um 2,5%. Jafnframt liggur fyrir tillaga að reglum um afslátt af fasteignaskatti og er tekjuviðmið uppfært miðað við launaþróun. Hámarksafsláttur skv. afsláttarreglum hækkar úr kr. 104.000 í kr. 110.000.
Samþykkt
Eins og fram kemur hækkar álagning sorphirðugjalda um 2,5% en að öðru leyti er ekki um breytingu á álagningu að ræða milli ára. Afsláttur af fasteignaskatti til tekjulágra elli- og örorkulífeyrisþega hækkar úr kr. 104.000- í kr. 110.000- eða um tæp 6%, tekjuviðmið uppfært miðað við launaþróun.
Bæjarráð samþykkir fyrirliggjandi tillögu að reglum um álagningu og afslátt af fasteignaskatti og vísar til afgreiðslu bæjarstjórnar.

2.Samningur um rekstur knattspyrnuvalla í Fjallabyggð 2025 og 2026

Málsnúmer 2504017Vakta málsnúmer

Í samræmi við bókun bæjarráðs frá 938.fundi hefur bæjarstjóri rætt við forsvarsmann KF varðandi framtíðarsýn félagsins um rekstur vallarins.
Afgreiðslu frestað
Fulltrúi D-lista leggur til að afgreiðslu málsins verði frestað þar sem hvorki liggur fyrir niðurstaða samtals bæjarstjóra við KF né greinargerð um hugmyndir félagsins varðandi umhirðu vallarins.

Bæjarstjóra falið að leggja fram vinnuskjal vegna samtals við KF um málið.

Afgreiðslu frestað.

3.Öldungaráð - Önnur mál 2025-2030

Málsnúmer 2502023Vakta málsnúmer

Fyrir liggja fyrirspurnir frá eldri borgurum er teknar voru fyrir á fundi Öldungaráðs.

Fyrirspurn frá eldri borgurum vegna snjómoksturs við hús þegar mikið snjóar og fólk kemst ekki út úr húsum sínum. Hefur sveitarfélagið einhver tök á að bregðast við eða fá einhverja til þess?

Jafnframt er óskað svara við:

Hversu margir eldri borgarar í Fjallabyggð njóta afsláttar af fasteignagjöldum og hverjar eru reglurnar fyrir slíkum afslætti?

Hversu margir íbúar eru 67 ára og eldri í Fjallabyggð og hversu margir eru á aldrinum 60 ára til 66 ára?
Vísað til afgreiðslu starfsmanns
Bæjarráð þakkar eldri borgurum og Öldungaráði fyrir þessar fyrirspurnir.
a) Snjómokstur
Fjallabyggð hefur enga aðila á sínum snærum til að sjá um snjómokstur heim að húsum hjá eldri borgurum og þeim sem eiga erfitt með að sinna þessu sjálf. En reynt hefur verið að bregðast við ef upp hafa komið atvik þar sem aðkomu t.d. sjúkrabíla er óskað og snjór hamlar för. Bæjarráð bendir á að oft hafa félagasamtök, hópar og einstaklingar í Fjallabyggð boðið fram þjónustu sína með snjómokstur heim að húsum hjá fólki gegn greiðslu.

b ) Árið 2026 voru 114 einstaklingar sem fengu afslátt af fasteignagjöldum í samræmi við reglur þar um. Reglurnar eru birtar á heimasíðu Fjallabyggðar og eru meðfylgjandi fyrir árið 2026.

c ) Íbúar 67 ára eða eldri í Fjallabyggð eru 410 árið 2026 skv. tölum frá Hagstofu og finna má á heimasíðu stofnunarinnar. Íbúar á aldrinum 60 - 66 ára eru samtals 218.

4.Möguleiki á heildarsamningi við STEF

Málsnúmer 2510062Vakta málsnúmer

Þann 28. ágúst sl. samþykkti stjórn Sambands íslenskra sveitarfélaga rammasamning við STEF og Samband flytjenda og hljómplötuframleiðenda (SFH) vegna opinbers tónflutnings á vegum sveitarfélaga. Jafnframt var Sambandinu falið að kynna samninginn fyrir sveitarfélögum og hvað hann felur í sér ef þau kjósa að nýta sér hann.

Markmið rammasamningsins er að einfalda framkvæmd og umsýslu höfundaréttargjalda vegna opinbers tónflutnings sveitarfélaga og skapa aukið gegnsæi og skýrleika um innheimtu og verðlagningu. Samningurinn tekur m.a. til tónflutnings í ýmsum stofnunum sveitarfélaga og á viðburðum sem sveitarfélög standa sjálf fyrir, með þeim afmörkunum sem nánar koma fram í samningnum.

Mikilvægt er að árétta að rammasamningurinn er valkvæður fyrir sveitarfélög. Undirritun Sambandsins skuldbindur ekki einstök sveitarfélög til að gerast aðilar að samningnum eða til greiðslu samkvæmt honum. Hvert sveitarfélag tekur sjálfstæða ákvörðun um hvort það vill gera sérstakan samning við STEF á grundvelli rammasamningsins. Sveitarfélögum er jafnframt áfram í sjálfsvald sett að gera eigin samninga við STEF.

Leyfisgjald skv. rammasamningi miðast við fjölda íbúa í viðkomandi sveitarfélagi og myndi Fjallabyggð greiða kr. 79 pr íbúa eða um kr. 158.000 árlega.
Samþykkt
Bæjarráð leggur til að gerður verði rammasamningur við STEF um höfundarréttargjöld vegna tónlistarflutnings á vegum sveitarfélagsins í Fjallabyggð skv. fyrirliggjandi drögum.

5.Þróun stjórnsýslu Fjallabyggðar

Málsnúmer 2611031Vakta málsnúmer

Fyrir liggur vinnuskjal bæjarstjóra um áframhaldandi þróun stjórnsýslu Fjallabyggðar. Málið er lagt fram til kynningar svo tryggja megi að verkefnið verði unnið í fullu gagnsæi og góðri samvinnu kjörinna fulltrúa, bæjarstjóra og stjórnsýslu.
Lagt fram til kynningar
Bæjarráð þakkar bæjarstjóra fyrir framlagt vinnuskjal.

Tómas Atli Einarsson, fulltrúi D-lista, lagði fram eftirfarandi bókun:

"Fulltrúi D-lista tekur undir mikilvægi þess að þróa stjórnsýslu Fjallabyggðar. Í kjölfar úttektarinnar frá 2024 hafa verið gerðar breytingar á skipuriti, samþykkt um stjórn sveitarfélagsins og nefndaskipan. Áður en ráðist er í frekari ráðgjöf þarf að liggja fyrir heildstætt stöðumat á tillögum úttektarinnar, þar sem fram kemur hvað hefur verið gert, hvað stendur eftir og hvaða árangur hefur náðst.

Í minnisblaði bæjarstjóra er óskað eftir að fjármögnun ráðgjafar verði tekin með í fjárhagsáætlun, en málið er lagt fram til kynningar. Fulltrúi D-lista telur að áður en tekin er afstaða til fjármögnunar eða frekari ráðgjafar þurfi að liggja fyrir skýr lýsing á verkefninu, kostnaði og þörf fyrir utanaðkomandi aðstoð.

Bæjarstjóri var ráðinn meðal annars á grundvelli reynslu af verkefnastjórnun og breytingastjórnun og eðlilegt er að hún leiði innri eftirfylgni úttektarinnar, með utanaðkomandi aðstoð þar sem sýnt er fram á sérstaka þörf."

6.Stöðufundir skipulags- og framkvæmdasviðs 2026

Málsnúmer 2601018Vakta málsnúmer

Fyrir liggur vinnuskjal bæjarstjóra frá fundi nr. 78 með skipulags- og framkvæmdasviði.
Lagt fram til kynningar
Lagt fram til kynningar

7.Fundargerðir nefnda og stjórna Fjallabyggðar - 2026

Málsnúmer 2601001Vakta málsnúmer

Fyrir liggja fundargerðir 12.fundar Öldungaráðs Fjallabyggðar og 37.fundar Stýrihóps um heilsueflandi samfélag.
Lagt fram til kynningar
Lagt fram til kynningar.

Fundi slitið - kl. 13:00.