Bæjarráð Fjallabyggðar

Á 820. og 821. fundi bæjarráðs óskaði deildarstjóri tæknideildar eftir heimild bæjarráðs til þess að halda útboð vegna verkefnisins. Á 820. fundi óskaði bæjarráð eftir umsögn tæknideildar um áhrif þeirra tillagna sem bókað var um á 308. fundi skipulags- og umhverfisnefndar, sem ekki krefjast nýs samráðs á heildarkostnað verkefnisins og áætlaðan verktíma þess. Útboðsgögn fyrir síðasta áfanga á endurnýjun Aðalgötu á Siglufirði og jafnframt fyrsta áfanga í nýju skipulagi miðbæjarins á Siglufirði voru lögð fram. Á 821. fundi bæjarráðs voru umbeðin gögn lögð fram og samþykkt heimild til útboðs með eftirfarandi breytingum:
a.
Yfirborðsefni götu á milli gatnamóta verði malbik, m.a. til þess að draga úr kostnaði og auka afmörkun götu við aðliggjandi gangstéttir.
b.
Breyta bílastæðalausn við Aðalgötu 26-30 svo það verði 2 stæði, auk tveggja annarra, útfærð á sama hátt og við Aðalgötu 32-34, og færa ljósastauralínu að götu.
c.
Fjarlægja bílastæði fyrir hreyfihamlaða á horni Aðalgötu og Suðurgötu þar sem staðsetning þess hentar illa akandi og gangandi umferð um svæðið enda gerir deiliskipulag ekki ráð fyrir því á þessum stað. Þá er gert ráð fyrir stæði fyrir hreyfihamlaða norðan megin götunnar.

Á 239. fundi bæjarstjórnar var málinu vísað til fullnaðarafgreiðslu bæjarráðs. Minnisblað skipulagsfulltrúa lagt fram.

Á 820. fundi bæjarráðs var lögð fram beiðni Ísfélags hf. um breytingu á gjaldskrá Hafnarsjóðs skv. heimildarákvæði í 5. fl. 10. gr. gjaldskrárinnar. Hafnarstjóra og deildarstjóra stjórnsýslu og fjármála falið að skoða sambærilegar hafnir og Fjallabyggðarhafnir og leggja tillögu að nánari útfærslu á núverandi heimild til veitingu afsláttar til stórnotenda og óska eftir umsögn hafnarstjórnar áður en málið er lagt fyrir næsta fund bæjarstjórnar.
Á 144. fundi hafnarstjórnar var erindi Ísfélags hf. lagt fram. Hafnarstjórn tók undir bókun bæjarráðs frá 820. fundi og vísaði málinu til fullnaðarafgreiðslu í bæjarstjórn.

Á 239. fundi bæjarstjórnar var afgreiðslu málsins frestað og bæjarráði veitt heimild til fullnaðarafgreiðslu.

Minnisblað EFLU vegna innviðagreiningar á vatnsveitu Ólafsfjarðar ásamt minnisblaði bæjarstjóra lagt fram.

Erindi heilbrigðisfulltrúa vegna athugunar á neysluvatni í Ólafsfirði lagt fram.

Erindi Félags kraftamanna vegna Víkingsins 2024 lagt fram.

Lögð fram umsókn Norlandia ehf. um leyfi til öflunar á þara í tilraunaskyni innan netalaga sveitarfélagsins Fjallabyggðar.

Erindi Sambands íslenskra sveitarfélaga um færslu tryggingafræðilegs endurmats Brúar lífeyrissjóðs ásamt áliti Reikningsskila- og upplýsinganefndar lagt fram til kynningar.

Samtök sveitarfélaga á köldum svæðum (SSKS) minna kjörna fulltrúa í sveitarstjórn, starfsfólk sveitarfélaga og aðra áhugasama á málþing um orkumál, sem haldið verður á Grand hóteli í Reykjavík föstudaginn 15. mars kl. 08:30-11:40.

Tímasetning málþingsins er valin með tilliti til þess að degi fyrr, fimmtudaginn 14. mars fer landsþing sambandsins fram í Silfurbergi í Hörpu.

Ársreikningur Moltu ehf. fyrir 2023 lagður fram til kynningar.

Innviðaráðuneytið vekur athygli á því að drög að fyrstu borgarstefnu fyrir Ísland hafa verið birt í samráðsgátt stjórnvalda. Í drögum að borgarstefnu er lagður grunnur að umræðu um núverandi stöðu, lykilviðfangsefni og framtíðarsýn fyrir borgarsvæðin. Mikilvægt er að fá fram skoðanir og álit almennings og annarra hagaðila og eru því öll hvött til að kynna sér drögin og senda umsögn sína inn í samráðsgáttina.

Frestur til að skila umsögn er til og með 22. mars nk.

Velferðarnefnd Alþingis sendir til umsagnar 115. mál Búsetuöryggi í dvalar- og hjúkrunarrýmum.
Þess er óskað að undirrituð umsögn berist eigi síðar en 1. mars nk.