Málefni Heilbrigðisstofnunar Norðurlands

Á fund bæjarráðs kom Jón Helgi Björnsson forstjóri Heilbrigðisstofnunar Norðurlands og Örn Ragnarsson framkvæmdastjóri lækninga Heilbrigðisstofnunar Norðurlands.

Rædd voru málefni heilbrigðisstofnunarinnar.

Framkvæmdastjórn HSN hefur komist að þeirri niðurstöðu að leggja af sjúkrabílavakt á Ólafsfirði en að sjúkrabíllinn verði áfram staðsettur þar og verði tiltækur ef aðstæður krefjast. Tryggja þarf viðbragð þar við bráðum uppákomum og er stefnt að því að mynda hóp vettvangsliða í samstarfi við slökkvilið og/eða björgunarsveit til að sinna fyrsta viðbragði áður en sjúkrabíll kæmi frá Siglufirði eða í undantekningartilfellum frá Dalvík.

Bæjarráð mótmælir harðlega ákvörðun Framkvæmdarstjórnar HSN og hvetur þá til að endurskoða ákvörðun sína. Jafnframt mun bæjarráð óska eftir fundi með fulltrúum Heilbrigðisráðuneytisins.

Bæjarráð hafnar beiðni forstjóra Heilbrigðisstofnunarinnar á Norðurlandi um aðkomu Slökkviliðs Fjallabyggðar við að koma á fót vettvangshópi í Ólafsfirði í kjölfar þess að vakt sjúkraflutningamanna verður lögð niður. Þetta verkefni er alfarið á ábyrgð Heilbrigðisstofnunar Norðurlands og því er það HSN að leysa þau verkefni sem tengjast heilbrigðisþjónustu á vegum ríkisvaldsins í Fjallabyggð.

Bæjarráð mótmælir jafnframt harðlega þeirri þjónustuskerðingu sem fyrirhuguð er hjá Heilbrigðisstofnun Norðurlands í Fjallabyggð. Bæjarráð telur óásættanlegt að vakt sjúkraflutningamanna í Ólafsfirði verði lögð niður. Jafnframt telur bæjarráð óásættanlegt að heilsugæslan í Ólafsfirði verði lokuð eftir hádegi yfir sumartímann. Ekki er einungis um að ræða skertan aðgang íbúa að heilsugæslu heldur einnig lengri afgreiðslufrest á lyfjum.

Bæjarráð hvetur forstjóra HSN til að leita annarra leiða svo ekki þurfi til þjónustuskerðingar að koma.

Bæjarráð felur bæjarstjóra að senda þessa bókun til heilbrigðisráðherra, framkvæmdarstjóra HSN og þingmanna kjördæmisins.

Málefni sjúkraflutninga í Ólafsfirði voru rædd á fundinum.
Óskað hefur verið eftir því að forstjóri Heilbrigðisstofnunar Norðurlands mæti á næsta fund bæjarráðs og hefur hann orðið við þeirri beiðni.

Jón Helgi Björnsson forstjóri Heilbrigðisstofnunar Norðurlands afboðaði sig á fund bæjarráðs vegna veðurs. Óskað hefur verið eftir því að hann mæti á fund bæjarráðs við fyrsta tækifæri.

Jón Helgi Björnsson forstjóri Heilbrigðisstofnunar Norðurlands mætti á fund bæjarráðs og ræddi stöðu sjúkraflutninga í Ólafsfirði.

Í máli forstjórans kom fram að unnið er að myndun teymis vettvangsliða og vinnan sé komin vel á veg.

Vonast er til að teymið verði starfhæft um mánaðamótin febrúar / mars.

Bæjarráð mun óska eftir upplýsingum um stöðu mála í lok febrúar.

Anna Gilsdóttir gæðastjóri Heilbrigðisstofnunar Norðurlands og yfirhjúkrunarfræðingur í Fjallabyggð, og Valþór Stefánsson yfirlæknir mættu á fund bæjarráðs og fóru yfir stöðu sjúkraflutninga í sveitarfélaginu.

Þau hvöttu til þess að stofnað yrði vettvangsliðateymi til að tryggja öryggi íbúana í ljósi niðurstöðu ráðherra.