Fréttir

Trefillinn sem lagður var milli bæjarkjarna Ólafsfjarðar og Siglufjarðar við vígslu Héðinsfjarðarganga verður til sýnis í viku í Menningarhúsinu Hofi á Akureyri frá 15. nóvember næstkomandi.  Einnig verður hann sýndur í Ráðhúsi Reykjavíkur frá 10. janúar. Umfang trefilsins er mikið og mun Eimskip aðstoða við að koma treflinum á sýningarstaðina. Hér gefst fólki tækifæri til að sjá trefilinn í einu lagi í allri sinni dýrð.

Bæjarráð og Skipulags- og umhverfisnefnd hafa  farið yfir hugmyndir um nýtingu á timburkurli sem kemur frá gámasvæðum í Fjallabyggð, samþykkt hefur verið að það verði nýtt samkvæmt þeim hugmyndum.

Í tilefni af grænlenskri menningarviku barna og unglinga eru tveir grænlenskir listamenn staddir í Fjallabyggð. Þetta eru þau  Pauline Motzfeldt sem sýnir grænlenska söngva og dansa og segir sögu trommunnar. Pauline er kennari og hefur haldið fyrirlestra og námskeið í Danmörku og Grænlandi. Miki Jacobsen er ljósmyndari, myndlistamaður, tónlistarmaður og leikari. Hann gerir m.a. andlitsgrímur eftir grænlenskri hefð. Hann hefur haldið fjölda sýninga, bæði á Grænlandi, Norðurlöndunum og í Kanada. Pauline og Miki halda stutta sýningu fyrir almenning í Tjarnarborg laugardaginn 30.október  kl. 12.30. Allir eru velkomnir og frítt inn. Fræðslu- og menningarfulltrúi Fjallabyggðar

Nú stendur yfir grænlensk menningarvika barna- og unglinga í Fjallabyggð. Grænlenskir listamenn koma í heimsókn, sýna grænlenska list og fræða börnin um Grænland, sögu þess og menningu.