Velferðarnefnd Fjallabyggðar

2. fundur 03. september 2025 kl. 16:00 - 17:00 í Ráðhúsi Fjallabyggðar, Gránugötu 24, Siglufirði
Nefndarmenn
  • Sæbjörg Ágústsdóttir formaður
  • Ólafur Baldursson varaformaður
  • Hanna Sigríður Ásgeirsdóttir aðalm.
  • Ólöf Rún Ólafsdóttir aðalm.
  • Guðrún Linda Rafnsdóttir aðalm.
Starfsmenn
  • Bjarkey Olsen Gunnarsdóttir sviðsstjóri
Fundargerð ritaði: Bjarkey Olsen Gunnarsdóttir sviðsstjóri velferðarsviðs

1.Samningur um Barnaverndarþjónustu á Mið - Norðurlandi

Málsnúmer 2301022Vakta málsnúmer

Uppsögn á samstarfi vegna Barnaverndarþjónustu á Mið-Norðurlandi.
Vísað til afgreiðslu bæjarstjórnar
Velferðarnefnd beinir því til bæjarstjórnar að segja upp samningi um Barnaverndarþjónustu Mið-Norðurlands þar sem fyrirhugað er að ganga til samninga við Barnaverndarþjónustu Norðurlands eystra.

Velferðarnefnd þakkar Barnaverndarþjónustu Mið-Norðurlands fyrir samstarfið.

2.Barnaverndarþjónusta á Norðurlandi eystra

Málsnúmer 2508035Vakta málsnúmer

Samningsdrög og kostnaðaráætlun vegna Barnaverndarþjónustu Norðurlands eystra.
Vísað til afgreiðslu bæjarstjórnar
Velferðarnefnd beinir því til bæjarstjórnar að ganga til samninga við Barnaverndarþjónustu á Norðurlandi eystra út frá fyrirliggjandi samningsdrögum.
Sunna Haraldsdóttir, starfandi forstöðumaður, kom á fund nefndarinnar og fór yfir starfsemi Hornbrekku vítt og breytt. Hornbrekka hefur fengið viðurkenningu sem Edenheimili. Að vera viðurkennt Eden heimili er ákveðinn gæðastimpill sem segir til um að hjúkrunarheimilið hefur sett sér markmið og ákveðna framtíðarsýn um að vinna með Eden stefnuna. Að vinna með Eden er að þróa samfélag sem leggur áherslu á að viðhalda og efla lífsgæði einstaklinga sem njóta stuðnings við athafnir daglegs lífs sem og huga að vellíðan starfsfólks og aðstandenda.
Félagsstarfið á Hornbrekku er með miklum blóma en mikil þrengsli setja starfinu takmörk.
Mikil ásókn er í dvöl á Hornbrekku og meiri en hægt er að verða við.
Samstarf er á milli elstu bekkja grunnskólans, leikskólans og Hornbrekku sem er afar gefandi.
Flestar stofnanir af þessu tagi eiga við mönnunarvandamál að etja og mikilvægt að horfa til framtíðar hvað það varðar þó staðan sé góð á Hornbrekku núna. Þörf er á að bjóða uppá reglulega endurmenntun sem og að starfsfólk sem vill fara í nám fái stuðning þar sem verkefnin verða fjölbreyttari með hverju árinu.

3.Hornbrekka - samningur við SÍ

Málsnúmer 2204077Vakta málsnúmer

Fyrir velferðarnefnd liggur erindi frá bæjarráði vegna Hornbrekku.
Vísað til afgreiðslu bæjarstjórnar
Velferðarnefnd Fjallabyggðar leggur til við bæjarstjórn Fjallabyggðar að samningi sveitarfélagsins við Sjúkratryggingar Íslands og Heilbrigðisráðuneytið vegna reksturs Hornbrekku verði sagt upp og rekstri heimilisins verði komið að nýju í hendur ríkisins. Tryggja verður að samfella verði í rekstri heimilisins, þjónusta verði tryggð og að ekki komi til uppsagna starfsfólks við stofnunina.

Ljóst er að starfsemi Hornbrekku sem dvalar- og hjúkrunarheimilis er mikilvæg fyrir sveitarfélagið Fjallabyggð og íbúa þess, bæði hvað varðar þá þjónustu sem þar er innt af hendi og þá atvinnu sem íbúar njóta af starfseminni.

Á Hornbrekku eru stöðugildi um 28 en fastir starfsmenn eru 38 auk þess sem 16 starfsmenn sinna afleysingum í ýmsum störfum tengdum rekstri stofnunarinnar. Gríðarlega mikilvægt er að þessi þjónusta haldist í sveitarfélaginu, að íbúar svæðisins njóti þessarar þjónustu í sinni heimabyggð og ekki síður að þau störf sem starfseminni fylgir haldist innan sveitarfélagsins.
Verkefnið er þó ekki á ábyrgð sveitarfélagsins lögum samkvæmt heldur er það á höndum ríkisvaldsins og því mjög mikilvægt að skoða heildarmyndina og í hvað stefnir varðandi reksturinn.

Undanfarin ár hefur rekstur Hornbrekku verið afar íþyngjandi fyrir Fjallabyggð og í raun gert ráð fyrir því í áætlunum að áfram verði mikill hallarekstur á starfseminni. Við slíka stöðu er ekki hægt að una þegar rekstur hjúkrunarheimila á landinu er á ábyrgð ríkisins en ekki sveitarfélaga og það er í hæsta máta óeðlilegt að íbúar greiði niður rekstur sem er á ábyrgð ríkisins með þessum hætti til fjölda ára um jafnvel tugi milljóna árlega. Þeim fjármunum sem farið hafa í hallarekstur heimilisins er betur varið í aukna þjónustu, lækkun gjalda eða auknar fjárfestingar í þeim málaflokkum sem sannanlega eru á ábyrgð sveitarfélagsins. Umleitanir um hækkun rekstrarframlaga frá ríkinu hafa litlu sem engu skilað og því hallarekstur aukist undanfarin ár.

Fundi slitið - kl. 17:00.