Skipulags- og umhverfisnefnd Fjallabyggðar

Lagt er til að Aðalskipulag Fjallabyggðar 2008-2028 verði breytt á þann veg að heimiluð verði frístundabyggð, svæði F15 og F16, innan hverfisverndarsvæðis á Kleifum í Ólafsfirði. Lögð fram drög af skipulagstillögu ásamt rökstuðningi dags. 19. júní 2018, unnin af Árna Ólafssyni hjá Teiknistofu arkitekta Gylfi Guðjónsson og félagar ehf. Einnig lagt fram staðbundið hættumat frá Veðurstofu Íslands vegna ofanflóða á svæðinu.

Lögð fram umsókn dagsett 27. júní 2018 þar sem Elís Hólm Þórðarson f.h. Arctic Freeride ehf. sækir um lóðina Bakkabyggð 6 í Ólafsfirði.

Lögð fram umsókn dagsett 9. júlí 2018 þar sem Ólafur Meyvant Jóakimsson sækir um lóðina Bakkabyggð 10 í Ólafsfirði.

Lögð fram umsókn um byggingarleyfi ásamt fylgigögnum, dagsett 3. júlí 2018 þar sem Steve Christer f.h. Kristins E. Hrafnssonar sækir um leyfi til að flytja hús á lóðina Kirkjuveg 4 í Ólafsfirði og gera á því endurbætur og breytingar. Einnig er sótt um að byggja bílskúr á lóðinni.

Lögð fram umsókn Mílu ehf. þar sem sótt er um leyfi til að klæða radíóhús í Hvanneyrarskál með grænni MEG plötuklæðningu. Einnig verður þak lektað og klætt með bárujárni.

Lagðir fram nýjir lóðarleigusamningar ásamt lóðarmarkayfirlýsingu og lóðarblaði fyrir Hvanneyrarbraut nr. 40 og 42. Eldri lóðarleigusamningar eru útrunnir og ekki í samræmi við núverandi lóðarmörk. Tillagan er unnin í samráði við lóðarhafa.

Lagður fram ný lóðarleigusamningur fyrir Suðurgötu 62 ásamt lóðarblaðið sem unninn var að beiðni lóðarhafa. Einnig lagt fram samþykki nágranna vegna breyttra lóðarmarka.

Lagður fram nýr lóðarleigusamningur ásamt lóðarblaði fyrir Suðurgötu 28 sem unninn var að beiðni lóðarhafa.

Lagt fram erindi dagsett 4. júlí 2018 þar sem Anna María Guðlaugsdóttir f.h. Garðyrkjufélags Tröllaskaga norðurs og Skógræktunarfélags Ólafsfjarðar, óskar eftir landsvæði til að rækta upp og gera að útivistarsvæði/skrúðgarði í Ólafsfirði. Svæðið sem um ræðir er á milli skólalóðar og Sigurhæðar og frá tjaldsvæði út að menntaskóla. Einnig er óskað eftir grænu svæði norðan við bílaplan menntaskólans.

Lagt fram erindi Ásgríms Pálmasonar fv. formanns húsfélagsins við Brimvelli, dagsett 24. júní 2018. Gerð er athugasemd við stöðuleyfi reykkofa við Brimvelli sem samþykkt var á síðasta fundi nefndarinnar. Farsælla væri ef skipulags- og umhverfisnefnd gæti fundið reykkofunum betri stað þar sem þeir valdi ekki reykmengun í kringum skepnuhald.

Á síðasta fundi skipulags- og umhverfisnefndar var samþykkt að veita Guðbrandi J. Ólafssyni stöðuleyfi fyrir reykkofa við Brimvelli og staðsetning yrði í samráði við tæknideild. Bæjarráð vísaði erindu aftur til úrvinnslu nefndarinnar.

Lögð fram umsókn dagsett 3. júlí 2018 þar sem Baldur Aadnegard óskar eftir leyfi fyrir reykkofa við Brimvelli í Ólafsfirði.

Lögð fram umsókn dagsett 3. júlí 2018 þar sem Guðni Ólafsson óskar eftir leyfi fyrir reykkofa við Brimvelli í Ólafsfirði.

Lögð fram umsókn dagsett 28. júní 2018 þar sem Haraldur Björnsson óskar eftir leyfi fyrir litlum reykkofa við Lambafen 1, Siglufirði.

Lagt fram erindi Hjalta Gunnarssonar f.h. Gunnars Júlíussonar þar sem óskað er eftir undanþágu til búfjárhalds á Flugvallarvegi 2, sem er utan svæðis sem skipulagt er fyrir búfjárhald.

Lagt fram erindi Björgvins Björgvinssonar f.h. Viking Heliskiing sem bæjarráð vísaði til umsagnar í skipulags- og umhverfisnefnd. Óskað er eftir leyfi til að lenda þyrlum á malarplani sunnan við Hótel Sigló. Einnig sækir fyrirtækið um að fá að setja niður olíutank af nýjustu gerð á planinu. Viking Heliskiing mun girða svæðið af og sjá til þess að svæðið verði tryggt.

Lagt fram erindi Stjórnar Sigurgvins - áhugamannafélags um minningu Gústa guðsmanns dagsett 3. júlí 2018. Óskað er eftir samþykki nefndarinnar fyrir staðsetningu styttu af Gústa á ráðhústorgið á Siglufirði, skv. meðfylgjandi uppdrætti.

Lagt fram erindi Fríðu Gylfadóttur dags. 2. júlí 2018 þar sem sótt er um leyfi fyrir uppsetningu skiltis á ljósastaur á horninu hjá Arionbanka sem vísar á Fridu súkkulaðikaffihús.

Lagt fram afrit stjórnsýslukæru vegna endurnýjunar byggingarleyfis fyrir Suðurgötu 49, Siglufirði þar sem framkvæmdaraðili kærir ákvörðun skipulags- og umhverfisnefndar frá 14. maí 2018 til úrskurðarnefndar umhverfis- og auðlindamála. Frestur til að gera athugasemdir vegna kærunnar eru 30 dagar.

Umræða tekin um útbreiðslu lúpínu í Fjallabyggð og aðgerðir til að hefta útbreiðslu hennar.