Bæjarstjórn Fjallabyggðar

Í lok fundar kvaddi Guðjón M. Ólafsson sér hljóðs og bókaði eftirfarandi fyrir hönd bæjarstjórnar:

"Sigríður Guðrún Hauksdóttir, bæjarfulltrúi Sjálfstæðisflokksins, er sá bæjarfulltrúi bæjarstjórnar Fjallabyggðar sem státar af lengstri setu í bæjarstjórn Fjallabyggðar. Á 16 ára löngum og farsælum ferli hefur hún gegnt fjölmörgum veigamiklum trúnaðarstörfum á vegum sveitarfélagsins og leitt mikilvægar nefndir og ráð.

Hún tók fyrst sæti í bæjarstjórn á kjörtímabilinu 2010 til 2014, þar sem hún gegndi bæði hlutverki bæjarfulltrúa og formanns fræðslu- og frístundanefndar. Á árunum 2014 til 2018 sat Sigríður áfram sem bæjarfulltrúi auk þess að vera aðalmaður í bæjarráði, en frá upphafi þess kjörtímabils og fram til loka árs 2016 var hún hluti af minnihluta bæjarstjórnar. Sá tími er eina tímabilið á 16 ára ferli Sigríðar Guðrúnar, þar sem hún sat í minnihluta bæjarstjórnar.

Á kjörtímabilinu 2018 til 2022 var Sigríður kjörin formaður fræðslu- og frístundanefndar á ný, auk þess sem hún tók við formennsku í öldungaráði. Hún var jafnframt varamaður í bæjarráði stærstan hluta þess tímabils en tók við embætti formanns bæjarráðs á árunum 2021 til 2022.

Frá upphafi kjörtímabilsins sem nú tekur senn enda, þ.e. frá árinu 2022, hefur Sigríður Guðrún gegnt embætti forseta bæjarstjórnar. Á árunum 2022 til 2025 sat hún einnig sem aðalmaður í bæjarráði og ásamt því að vera formaður stjórnar dvalarheimilisins Hornbrekku. Þá hefur hún setið sem aðalmaður í skólanefnd Menntaskólans á Tröllaskaga á núverandi kjörtímabili og fór með formennsku í skólanefndarinnar árin 2022 til 2024.

Auk ofangreindra starfa hefur Sigríður Guðrún sinnt ýmsum öðrum mikilvægum trúnaðarstörfum. Hún hefur átt sæti í stjórn Síldarminjasafns Íslands og Þjóðlagasetursins á Siglufirði, verið fulltrúi sveitarfélagsins á landsþingum Sambands íslenskra sveitarfélaga og átt sæti í fulltrúaráði Brunabótafélags Íslands.

Bæjarstjórn Fjallabyggðar f.h. íbúa og starfsfólks sveitarfélagsins færir Sigríði Guðrúnu þakkir fórnfúst starf í þágu samfélagsins í Fjallabyggð og óskar henni velfarnaðar í hverju því sem hún ákveður að taka sér fyrir hendur. "

S.Guðrún Hauksdóttir kvaddi sér hljóðs og bókaði eftirfarandi:

"Það hefur verið bæði forréttindi og ánægja að fá að starfa fyrir sveitarfélagið okkar í öll þessi ár. Fjallabyggð er einstakt samfélag, einstakt vegna kraftsins sem býr í fólkinu hér. Þið hafið sýnt mér traust og samstöðu, og fyrir það verð ég ávallt þakklát.

Ég hef átt þann heiður að starfa með frábæru fólki í sveitarstjórn síðastliðin 16 ár. Við höfum tekist á við verkefni stór og smá, ekki alltaf sammála um leiðir, en ávallt sammála um það markmið, að vinna fyrir samfélagið okkar og vil ég nota tækifærið og þakka samferðafólkinu í gegnum öll þessi ár fyrir samstarfið, einnig vil ég færa starfsfólki Fjallabyggðar sérstakar þakkir.

Ég óska nýkjörnum fulltrúum til hamingju með kjörið. Sveitarstjórnarstarfið er ábyrgðarmikið en um leið gefandi, og mér hefur ávallt fundist það styrkja samfélagið þegar fólk með ólík sjónarmið býður sig fram. Ég óska þeim góðs gengis í þeim verkefnum sem fram undan eru og vona að starfið verði þeim jafn lærdómsríkt og það hefur verið mér."