Bæjarráð Fjallabyggðar

Með fundarboði fylgir bókun frá 115. fundi markaðs- og menningarnefndar, 20.2.2025, þar sem nefndin vísar hugmynd að uppsetningu á salernisaðstöðu í Skarðsdalsskógi sem nýta mætti fyrir útivistarfólk á svæðinu til umfjöllunar í bæjarráði. Í bókun nefndarinnar kemur fram að þörf á slíkri aðstöðu sé til staðar og að henni hafi verið komið á framfæri við sveitarfélagið. Á fundi nefndarinnar kynnti markaðs- og menningarfulltrúi mögulega útfærslu verkefnisins og hvaða styrkleiðir eru mögulegar til slíks verkefnis s.s. hjá Framkvæmdasjóði ferðamannastaða.

Fyrir liggur samantekt á kostnaði við framkvæmdir á skíðasvæðinu í Skarðsdal vegna ársins 2024 og þeirra framkvæmda sem færðar voru yfir á árið 2025.

Fyrir liggur erindi frá félagi eldri borgara á Siglufirði þar sem fram kemur tillaga frá stjórn félagsins um að það afsali sér púttvelli til Fjallabyggðar og þar með umsjón og umhirðu vallarins.

Fyrir liggur erindi frá félagi eldri borgara á Ólafsfirði þar sem tilkynnt er um breytingar á fulltrúum félagsins í Öldungaráði. Félagið tilnefnir Þorbjörn Sigurðsson og Björn Þór Ólafsson sem aðalmenn í Öldungaráð og Rögnvald Ingólfsson og Önnu Maríu Guðlaugsdóttur sem varamenn.

Fyrir liggur eftirfarandi tillaga frá fulltrúum H-lista:

"Samkvæmt þingsályktun á þingskjali nr. 1724 á 154. löggjafarþingi á að vinna haf- og strandsvæðaskipulag fyrir Eyjafjörð á árinu 2025 sem afmarkast frá Siglunesi í vestri og Bjarnarfjalli í austri.

H listinn telur mikilvægt að bæjarstjórn/bæjarráð hvetji félagsmálaráðherra til að skipa nú þegar í svæðisráð, samkvæmt ofanskráðu, sem fer fyrir þeirri vinnu er varðar skipulag á haf- og strandsvæðum í samvinnu við Skipulagsstofnun. Vísa má til bréfs frá Svæðisskipulagsnefnd Eyjafjarðar dags 22. Nóvember 2019 til Skipulagsstofnunar þar sem hvatt er til að ráðist verði í gerð haf- og strandsvæðaskipulags í Eyjafirði.

Það er mjög brýnt að þessi vinna fari sem fyrst í gang þar sem fyrirtæki í Fjallabyggð hefur áform um fiskeldi á svæðinu og því þörf á að hraða vinnu við skipulagið."

Fyrir liggur samningur til staðfestingar á milli Tengja hf og Fjallabyggðar um ljósleiðaralagningu í Fjallabyggð. Verkefnið hefur þegar fengið styrkveitingu frá Fjarskiptasjóði sem ætlað er að standa undir kostnaði við lagninguna.

Fyrir liggur fundarboð frá Markaðsstofu Norðurlands þar sem boðað er til fundar um málefni Flugklasans þann 2.apríl n.k. Óskað er eftir þátttöku sveitarstjóra/bæjarstjóra og/eða annarra fulltrúa sveitarfélagsins á fundinn.

Fyrir liggur umfjöllun Skipulags- og umhverfisnefndar Fjallabyggðar um erindi frá Svæðisskipulagsnefnd Eyjafjarðar varðandi framtíðar fyrirkomulag skipulags - og byggingarmála á svæðinu.

Fyrir liggur fundarboð á ársþing SSNE sem fram fer á Hótel Natur, Svalbarðsstrandarhreppi, 2-3 apríl n.k.

Fyrir liggur fundarboð á aðalfund Lánasjóðs sveitarfélaga ohf sem fram fer 20. mars n.k., ásamt tillögum sem lagðar verða fyrir fundinn

Fyrir liggur erindi frá Sinfóníuhljómsveit Íslands þar sem sveitarfélög eru hvött til þess að sundlaugar og baðstaðir verði opnir fram á kvöld á meðan tónleikum hljómveitarinnar verður sjónvarpað þann 28.ágúst n.k. Óskað er eftir samstarfi við sveitarfélögin með þessum hætti í verkefnið "Sinfó í sundi"

Fyrir liggur vinnuskjal frá stöðufundi umhverfis - og tæknideildar.

Fyrir liggja drög að samstarfssamningi á milli Fjallabyggðar og Veraldarvina til þriggja ára þar sem m.a. felur í sér tiltekin verkefni í samráði við Skógræktarfélögin á Siglufirði og í Ólafsfirði og önnur verkefni á opnum svæðum í Fjallabyggð.

Fyrir liggur uppsagnarbréf frá fjármálastjóra Fjallabyggðar sem lætur af störfum þann 31.maí n.k.