Breyting á deiliskipulagi íþróttasvæðis á Ólafsfirði

Nefndin leggur til við bæjarstjórn að breytingin verði auglýst í samræmi við 1.mgr., 43.gr skipulagslaga. Einnig leggur nefndin til að haldin verði kynning fyrir íbúa áður en frestur til að skila inn athugasemdum rennur út.

Til máls tók Helgi Jóhannsson og lagði fram eftirfarandi bókun:

"Það er gleðilegt að hér liggur fyrir breyting á deiliskipulagi vegna byggingu knatthúss á íþróttasvæðinu í Ólafsfirði.
Hér er um gríðalega stórt hús að ræða og því hef ég velt fyrir mér að skoðað verði að mörk deiliskipulagsins að austan á móts við núverandi æfingasvæði verði færð ofar/austar upp í brekkuna og að byggingareitur fyrir væntanlegt hús verði stækkaður til austurs.
Gert er ráð fyrir að húsið getur orðið allt að 15 metrar á hæð sem er 5 metrum hærra en íþróttahúsið og tel ég að það væri skoðandi að keyra það eins langt í austur og hægt er til að minnka sjónræn áhrif.
Einnig að göngustígur sem liggur nú meðfram Aðalgötu 15 til suðurs og austurs verði óbreyttur."

Bæjarstjórn samþykkir með 7 atkvæðum fyrirliggjandi tillögu skipulags- og umhverfisnefndar á drögum að breytingu á deiliskipulagi íþróttasvæðis í Ólafsfirði og felur framkvæmdasviði að auglýsa tillöguna í samræmi við 1.mgr.41. gr. skipulagslaga nr 123/2010 auk þess sem samþykkt er að haldin verði kynning fyrir íbúa áður en frestur til að skila inn athugasemdum rennur út.

Nefndin leggur til að athugasemdum verði svarað í samræmi við framlagðar tillögur. Nefndin leggur til við bæjarstjórn að deiliskipulagið verði samþykkt og sent til Skipulagsstofnunar í samræmi við 43.gr. skipulagslaga nr. 123/2010.

Í samræmi við 42. gr. skipulagslaga nr. 123/2010 leggur nefndin til við bæjarstjórn að deiliskipulagsbreytingin verði samþykkt og leggur fram meðfylgjandi rökstuðning.
HMS gerir eftirfarandi athugasemdir vegna samþykktar deiliskipulagsins:

1. Engin sérákvæði eru skilgreind í aðalskipulagi fyrir íþróttasvæði 326 ÍÞ, en hins vegar er núverandi notkun svæðisins lýst sem knattspyrnuvelli og stúku. Ekki er til staðar heimild til byggingar 3.700 m² knatthallar.

ÍÞ (íþróttasvæði) í skipulagsreglugerð er skilgreint sem svæði fyrir landfreka íþróttaaðstöðu og stærri íþróttamiðstöðvar, sem styður almennt að knatthöllin geti verið innan landnotkunarflokksins. Sett hafa verið fram markmið í Aðalskipulagi Fjallabyggðar 2020-2032 um áframhaldandi uppbyggingu íþróttaaðstöðu í Ólafsfirði með áherslu á knattspyrnu. Uppbygging knatthallar skv. breyttu deiliskipulagi styður við þá stefnu sveitarfélagsins.
Í gildandi aðalskipulagi kemur jafnframt fram að nánari útfærsla fari fram á deiliskipulagsstigi þegar sérákvæði segja ekki til um nýtingu og byggðamynstur. Nefndin telur því ekki þörf á breytingu aðalskipulags vegna fyrirhugaðrar uppbyggingar knatthallar þar sem gildandi stefna aðalskipulags býður upp á svigrúm til uppbyggingar slíks mannvirkis.

2. Gera þarf breytingu á aðalskipulagi samhliða deiliskipulagsbreytingunni þar sem m.a. kemur fram heimild fyrir knatthöll og heimilað hámarksbyggingarmagn í ákvæðum og fleira eftir því sem við á.

Sjá svar við lið nr.1.

3. Þar sem mörk skipulagssvæðis ná nú utan um stærra svæði, þ.m.t. skólahúsnæði Menntaskólans við Tröllaskaga, þarf að fjalla um það í breyttu deiliskipulagi og gera skýra grein fyrir þeim mannvirkjum sem fyrir eru og áformum um stækkun eða breytingu eftir því sem við á.

Í kaflanum "Breyting á uppdrætti" er fjallað um lýsingu á stækkun skipulagssvæðisins. Fjallað er um mannvirki sem falla innan stækkaðs svæðis, þar á meðal húsnæði menntaskólans. Ekki er fyrirhuguð stækkun eða breyting á mannvirkinu en fjallað er um óverulega breytingu lóðarmarka við skólann. Komið verður fyrir tengivegi í gegnum bílastæði sem er utan lóðar menntaskólans til að tryggja aðkomu með hringakstri við fyrirhugaða knatthöll, tenging sem er í dag notuð fyrir skólarútu grunnskólans. Þar sem ekki eru lagðar til breytingar á þeim mannvirkjum sem fyrir eru á svæðinu umfram það sem kemur fram í gildandi deiliskipulagi, er ekki talin þörf á frekari umfjöllun um þau.