Fréttir

Núna um helgina var annað KB-bankamótið í golfi haldið í Keflavík en þessi mótaröð er fyrir bestu og forgjafarlægstu kylfinga landsins. Leiknar eru 36 holur og keppt var laugardag og sunnudag. Kylfingurinn Sigurbjörn Þorgeirsson úr Golfklúbbi Ólafsfjarðar var á meðal þátttakenda og stóð hann sig frábærlega. Hann endaði í 5. sæti af þeim 108 kylfingum sem hófu leik, 3 höggum frá fyrsta sætinu. Veðrið setti strik í reikninginn fyrri daginn með miklu hvassviðri og rigningu en blíðviðri var þann seinni. Sigurbjörn spilaði holurnar 36 á 150 höggum.  

Um 130 börn tóku þátt í Knattspyrnuskóla Grétars Rafns Steinssonar og Knattspyrnufélags Siglufjarðar sem var haldinn dagana 2. til 6. júní síðastliðinn.

Eins og mörgum er kunnugt um héldu nemendur í 5. bekk áfram samstarfi sínu við írskan skóla í Cork héraði á Írlandi, undir leiðsögn kennara síns Guðnýjar Róbertsdóttur. Fylgst var með ferðum jaðraka til Íslands og á Íslandi. Krakkarnir á Siglufirði fóru fram á fjörð og fylgdust með ferðum jaðraka og sendu skýrslu til Írlands þar um. Skemmtilegt er að segja frá því að nú hefur verið sett upp heimasíða fyrir verkefnið á Írlandi þar sem greint er frá samstarfinu og sýndar myndir af nemendum okkar í 5. bekk við rannsóknarstörf. Skoðið sérstaklega hlekkinn http://www.scoiliosaefnaofa.com/Godwit.htm   

Sjómannafélag Ólafsfjarðar stendur fyrir glæsilegri dagskrá um næstu helgi. Meðal þess sem er boðið uppá eru leiktæki, frítt í bíó fyrir börn og unglinga, söngvarana Magnús Þór, Siggu Beinteins og Söngvaborg auk leikarans Björgvins Frans. Dagskráin hefst strax á föstudegi og stendur fram á sunnudagskvöld. Magnús Þór Sigmundsson heldur tónleika á föstudagskvöldið auk þess sem börnum og unglingum verður boðið frítt í bíó.

Á Sjómannadaginn 1. júní n.k. viljum við bjóða ykkur í heimsókn til Ólafsfjarðar.  Glæsileg skemmtidagskrá verður í boði Sjómannafélags Ólafsfjarðar. Dagskráin er nánar auglýst  í Tunnunni Boðið verður uppá ókeypis sætaferðir fram og til baka.  Ferðafélagið Trölli Ólafsfirði býður uppá skemmtilega skoðunarferð um Ólafsfjörð fyrir farþega. Farið verður frá Torginu Siglufirði kl. 11:30 og til baka frá Ólafsfirði milli 17:00 - 18:00.