Fréttir

Fjallabyggð vill þakka viðbragðsaðilum, fyrirtækjum og einstaklingum sem tryggðu öryggi íbúa og önnuðust björgunaraðgerðir í liðinni viku fyrir fórnfúst og óeigingjarnt starf. Það starf sem þeir hafa innt af hendi er ómetanlegt fyrir íbúa Fjallabyggðar og verður seint fullþakkað.

Áfram verður nemendum í 1.-4. bekk Grunnskóla Fjallabyggðar gefinn kostur á frístundarstarfi strax að loknum skólatíma kl. 13.35 - 14.35. Starfið er fjölbreytt og í samstarfi við íþróttafélög og tónlistarskólann. Nemendur eru skráðir í frístundarstarfið hálfan vetur í einu. Í undanteknum tilvikum, ef gild ástæða er til, er hægt að endurskoða skráningu 25.-27. hvers mánaðar og tæki breytingin þá gildi um næstu mánaðarmót á eftir.

Markaðsstofa Norðurlands stefnir að því að halda fund um flugmál á Hótel Kea á Akureyri fimmtudaginn 19. desember nk. frá kl. 12:00 – 14:00.

Bæjarstjórn Fjallabyggðar lýsir þungum áhyggjum yfir þeim aðstæðum sem sköpuðust í Fjallabyggð og víðar á landinu þegar óveður gekk yfir fyrr í vikunni, þar sem rafmagns-, heitavatns-, útvarps- og fjarskiptakerfi virkuðu ekki sem skyldi og olli mikilli óvissu og óöryggi.

Að gefnu tilefni eru íbúar Fjallabyggðar vinsamlegast beðnir um að fara sparlega með rafmagnið eins og kostur er og taka til dæmis jólaskreytingar úr sambandi og annað það sem ekki er bráð nauðsynlegt.

Tilkynning um skólahald í Grunnskóla Fjallabyggðar á morgun föstudaginn 13. desember verður send út í fyrramálið svo framarlega sem fjarskipti verði í lagi. Vonast er til að rafmagn verði í lagi svo hefja megi skólastarf að nýju. Tilkynningar um skólahald í leikskólum birtast á heimasíðum deildanna.

Rafmagn er komið á öll hús á Siglufirði og í hluta húsa Ólafsfjarðar. Samkvæmt upplýsingum frá RARIK er unnið hörðum höndum að koma rafmagni á og setja upp nauðsynlegt varaafl. Allar vélar Skeiðsfossvirkjunar eru komnar í lag. Heitt vatn er komið í öll hús á Siglufirði en húseigendum er bent á að tappa af lofti sem kann að hafa myndast í ofnakerfi húsanna. Fært er um Ólafsfjarðarmúla og verið að moka veginn um Almenninga.

Fjöldahjálparstöðvar hafa verið opnaðar á Hornbrekku í Ólafsfirði og á Heilsugæslunni á Siglufirði. Rauði Krossinn í Ólafsfirði og á Siglufirði hafa opnað fjöldahjálparstöðvar í Hornbrekku Ólafsfirði og á heilsugæslunni á Siglufirði. Opið hefur verið frá því fyrir hádegi á Hornbrekku og hafa þegar nokkrir leitað þangað. Opið verður frá kl. 14:00-18:00 á Heilsugæslunni á Siglufirði. Boðið er upp á kex, kökur og heita drykki og umfram allt hlýju og samveru á báðum stöðum.

Skólahald verður með eðlilegum hætti í leik- og grunnskóla Fjallabyggðar á morgun fimmtudaginn 12. desember að því gefnu að rafmagn verði í lagi. Eru foreldrar- og forráðamenn beðnir um að fylgjast vel með fréttum af fyrirhuguðu skólastarfi.

Tímabundin truflun er á kaldavatnsrennsli á Siglufirði. Gert er ráð fyrir að rennslið komist í samt lag innan fárra klukkustunda.