Rekstur skíðasvæðis í Skarðsdal

Bæjarráð felur bæjarstjóra að vinna málið áfram að teknu tilliti til þeirra sérstöku aðstæðna sem myndast hafa vegna slita Leyningsáss og nýsamþykktra innkaupareglna sveitarfélagsins.

Í ljósi fyrirliggjandi upplýsinga um áhugasama aðila samþykkir bæjarráð að ganga til samninga við L7 um rekstur skíðasvæðisins í Skarðsdal fyrir tímabilið 2025-2026 og felur bæjarstjóra að ganga frá undirritun samnings með fyrirvara um samþykki bæjarstjórnar þess efnis á forsendum fyrirliggjandi gagna.

Bæjarráð þakkar samantektina þar sem m.a. kemur fram að gestafjöldi á svæðinu eykst um ríflega 2.000 manns frá því í fyrravetur þrátt fyrir að aðeins séu 6 fleiri opnunardagar. Augljóst er að vel hefur tekist til með rekstur svæðisins í vetur og er rekstraraðila, L-7, þakkað fyrir vel unnið starf. Bæjarstjóra falið að kanna möguleika á rekstrarfyrirkomulagi næsta vetrar og leggja fram tillögur fyrir bæjarráð, sem og áætlun um þær framkvæmdir sem fram geta farið í sumar áður en rekstur svæðisins hefst að nýju næsta vetur.
Þá felur bæjarráð bæjarstjóra að leggja fyrir minnisblað um viðhaldsáætlun.

Bæjarráð þakkar bæjarstjóra samantektina og vísar til umræðu í tengslum við gerð fjárhagsáætlunar fyrir árið 2027.

Bæjarráð leggur til að málinu verði frestað til næsta fundar bæjarráðs. Bæjarstjóra falið að afla frekari upplýsinga.

Bæjarráð þakkar bæjarstjóra fyrir framlagt minnisblað og felur honum að auglýsa eftir rekstraraðila Skíðasvæðisins í Skarðsdal.

Bæjarráð þakkar sýndan áhuga á rekstri skíðasvæðisins í Skarðsdal. Sviðsstjóra Skipulags- og framkvæmdasviðs falið að útbúa gögn þar sem óskað verður eftir verðtilboðum og rekstrarútfærslum frá þessum aðilum.

Til stendur að bjóða út rekstur skíðasvæðisins og fór formaður yfir helstu atriði er það varðar.

Bæjarráð samþykkir að fresta afgreiðslu málsins og óska eftir áliti lögmanns á jafnri stöðu umsækjenda.
Bæjarráð óskar jafnframt eftir stöðu viðhalds á tækjabúnaði og framkvæmda því tengdu sem tilheyra svæðinu fyrir næsta bæjarráðsfund. Þá óskar bæjarráð eftir lista yfir lausfé sem tilheyrir svæðinu.

Fulltrúar H-lista og S-lista leggja til að umsóknum um rekstur skíðasvæðisins verði öllum hafnað og að sveitarfélagið sjái sjálft um rekstur skíðasvæðisins á komandi vetri. Svæðið er nú komið í eigu Fjallabyggðar og til þess að fá betri tilfinningu fyrir rekstrinum teljum við nauðsynlegt að sveitarfélagið sjái um rekstur svæðisins amk næsta vetur. Farið verður í gerð rekstraráætlunar fyrir svæðið nú í kjölfarið.

Fulltrúi D-lista bókaði eftirfarandi:
„Fulltrúi D-lista í bæjarráði leggst gegn því að öllum umsóknum um rekstur skíðasvæðisins í Skarðsdal verði hafnað og að Fjallabyggð taki sjálf yfir reksturinn.

Ákvörðun um eigin rekstur sveitarfélagsins er tekin áður en fyrir liggja rekstraráætlun, kostnaðarmat, mannaflaáætlun eða greining á þeirri fjárhagslegu og rekstrarlegu áhættu sem honum fylgir. Sú röksemd að sveitarfélagið þurfi að reka svæðið til að „fá betri tilfinningu fyrir rekstrinum“ getur ekki talist fullnægjandi grundvöllur fyrir ákvörðun um ráðstöfun opinberra fjármuna.

Áformin ganga jafnframt gegn samþykktri stefnumörkun Fjallabyggðar í íþróttamálum, þar sem gert er ráð fyrir útvistun á heildarumsjón og rekstri íþróttasvæða til íþróttafélaga og/eða verktaka með það að markmiði að nýta fagþekkingu og fjármuni betur.

Fulltrúi D-lista styður áframhaldandi rekstur og uppbyggingu skíðasvæðisins í Skarðsdal. Það er hins vegar óforsvaranlegt að hafna öllum umsóknum og ákveða eigin rekstur sveitarfélagsins áður en rekstraráætlun, mannaflaáætlun og heildstætt kostnaðarmat liggja fyrir.

Meirihlutinn hefur hvorki sýnt fram á hvers vegna umsóknirnar teljast ófullnægjandi né að eigin rekstur sveitarfélagsins sé hagkvæmari eða betur til þess fallinn að tryggja farsælan rekstur svæðisins.
Með ákvörðuninni er bæjarsjóður látinn taka á sig ómetna fjárhagslega og rekstrarlega áhættu. Fulltrúi D-lista getur því ekki stutt tillöguna og telur rétt að afgreiðslu málsins verði frestað þar til fullnægjandi gögn og faglegur, rekjanlegur samanburður á kostunum liggja fyrir."

Fulltrúar H-lista og S-lista bóka eftirfarandi:

"Fulltrúar meirihlutans í bæjarráði geta ekki með nokkru móti skilið fullyrðingu bæjarráðsfulltrúa D-lista, Tómasar Atla Einarssonar, um að bæjarsjóður taki á sig „ómetna fjárhagslega og rekstrarlega áhættu“ með þessari ákvörðun.

Það á varla að þurfa að rifja það upp fyrir bæjarráðsfulltrúa D-listans þær umtalsverðu fjárhæðir, sem á síðustu árum hafa runnið úr bæjarsjóði til þess að koma skíðasvæðinu í það horf sem það er komið. Auðvitað veit bæjarráðsfulltrúi D-listans hvernig í pottinn var búið þegar sveitarfélagið steig inn og tók fulla og rekstar- og fjárfestingalega ábyrgð á Skíðasvæðinu í Skarðsdal - þrátt fyrir að vera ekki á þeim tíma formlegur eigandi svæðisins. Bæjarráðs- og bæjarfulltrúi Tómas Atli var á síðasta kjörtímabili formaður verkefnahóps um framtíðaruppbyggingu í Skarðsdal og leysti það verkefni af mikilli ábyrgð og því kemur það núverandi meirihluta spánskt fyrir sjónir að hann telji nú „fjárhagslega og rekstrarlega áhættu“ sveitarfélagsins aðra en hún var þegar hann stýrði verkefnahópnum. Þær rekstrarforsendur sem lágu til grundvallar því að sveitarfélagið axlaði rekstar- og fjárfestingarlega ábyrgð eru þær hinar sömu og komu frá umræddum verkefnahópi og öll síðasta bæjarstjórn studdi þ.m.t. hann sjálfur.

Hið eina sem vakir fyrir meirihlutanum er að tryggja góðan og glæsilegan rekstur á Skíðasvæðinu og því er miður að fulltrúi D-listans leggist gegn fyrri gjörðum með lýðskrumi. Bæjarfulltrúar meirihlutans gera þá lágmarkskröfu að fulltrúi D-listans í bæjarráði sé samkvæmur sjálfum sér og noti ekki grunnsamfélagsþjónustu til þess að reyna að fella pólitískar smákeilur.

Hvað rekstraráætlun varðar að þá er það ekki rétt hjá bæjarráðsfulltrúanum, Tómasi Atla, að ekki liggi fyrir rekstraráætlun, mannaflaáætlun og heildstætt kostnaðarmat. Slíkt var unnið fyrir núverandi rekstrarár og verður áætlun um reksturinn m.a. byggð á því. Einnig liggur fyrir að fara þarf í viðamiklar viðgerðir á snjótroðurum og óvíst hvenær þeir verði klárir. Með þá óvissu er óráð að ganga til samning við rekstraraðila.
Að endingu skilja fulltrúar meirihlutans ekki hvernig bæjarráðsfulltrúi Tómas Atli getur haldið því fram að meirihlutinn telji umsóknir ófullnægjandi. Meirihlutinn hefur aldrei haldið slíku fram og frábiður sér slíkan málflutning."

Tillaga um að hafna öllum umsóknum um rekstur skíðasvæðisins og að sveitarfélagið sjái sjálft um rekstur skíðasvæðisins á komandi vetri samþykkt með tveimur atkvæðum gegn einu.

Bæjarfulltrúi D-lista lagði fram eftirfarandi bókun:
"Fulltrúi D-lista styður áframhaldandi rekstur og uppbyggingu skíðasvæðisins í Skarðsdal en gerir athugasemdir við undirbúning ákvörðunar um að hafna öllum umsóknum og fela sveitarfélaginu reksturinn.

Skrifleg lögfræðiráðgjöf, sem nú er meðal fundargagna, lá fyrir við fyrri afgreiðslu málsins en hafði ekki verið afhent fulltrúa D-lista. Honum var þá aðeins gerð munnleg grein fyrir henni. Í skriflega svarinu er mælt með að vísa umleitunum eins umsækjanda frá, en ekki lagt til að öllum umsóknum verði hafnað eða að sveitarfélagið taki reksturinn yfir.

Jafnframt er gerð athugasemd við frágang síðustu fundargerðar. Vegna sérstakra aðstæðna var fallist á skil bókana eftir fund. Bókun fulltrúa D-lista var send kl. 13:32 og fjórum mínútum síðar áskildi meirihlutinn sér rétt til svars. Viðbótarbókun meirihlutans barst rétt fyrir kl. 23 sama kvöld, um níu og hálfri klukkustund síðar, og innihélt ný efnisatriði og persónulegar ávirðingar.

Beiðni fulltrúa D-lista um svigrúm til viðbragða var hafnað. Hann dró eigin viðbótarbókun síðan til baka þegar ljóst var að hún yrði ekki tekin inn, til að ljúka samskiptunum og færa umræðuna á næsta fund. Það fól ekki í sér samþykki við fyrri synjun eða mismunandi meðferð bókana.
Fulltrúi D-lista hafnar ásökunum um lýðskrum og pólitískar smákeilur. Gagnrýni hans snýr að upplýstri ákvarðanatöku og ábyrgri meðferð fjármuna. Óskað er eftir formlegri, rökstuddri afgreiðslu á fyrirliggjandi leiðréttingarkröfu og skýringu á því hvaða fyrirkomulag gilti um skil bókana og lokun fundargerðar."

Bæjarfulltrúar H og S-lista lögðu fram eftirfarandi bókun:
"Bæjarráðsfulltrúa D-listans bauðst, eftir að honum var hafnað um seinni bókun á síðasta fundi, að taka málið upp á næsta fundi bæjarráðs sem hann gerir hér og þar með hefur hann haft tækifæri til þess að koma sínum sjónarmiðum til skila. Samkomulag var á síðast bæjarráðsfundi um að bókanir yrðu lagðar fram eftir fund og komu báðir aðilar sjónarmiðum sínum á framfæri. Þar sem öllum umsóknum um rekstur skíðasvæðisins í Skarðsdal var hafnað, þá mun ekki reyna á hæfi aðila í þessu máli."

Bæjarfulltrúi D-lista lagði fram eftirfarandi bókun:

"Fulltrúi D-listans telur að framlögð gögn sýni ekki fram á hagkvæmni þess að sveitarfélagið taki yfir rekstur skíðasvæðisins í Skarðsdal. Minnisblaðið lýsir fyrirhuguðu starfsmannahaldi en þar vantar mat á heildarkostnaði, tekjuforsendum og fjárhagslegri áhættu, auk samanburðar við aðrar rekstrarleiðir. Gögnin veita því ekki fullnægjandi grunn til að meta fjárhagslegar afleiðingar yfirtökunnar."

Bæjarráð samþykkir með tveimur atkvæðum að heimila að eftirfarandi störf verði auglýst:
-Umsjónarmanns Skíðasvæðisins í Skarðsdal, 100% starf
-Almennur starfsmaður, 100%
-Tveir starfsmenn til að sinna vinnu á snjótroðurum.

Bæjarstjóra falið að ganga frá auglýsingu