Samningur undirritaður í 984 metra hæð

Sparisjóður Ólafsfjarðar og Creditinfo Ísland boðuðu til blaðamannafundar í 984 metra hæð uppá Múlakollu í Ólafsfirði í dag kl 14:00. Lagt var af stað frá gamla Múlaveginum ofan við Brimnes, á snjóstroðara og snjósleðum. Þegar upp var komið rituðu Jónas Björnsson sparisjóðsstjóri Sparisjóðs Ólafsfjarðar og Hákon Stefánsson starfandi stjórnarformaður Creditinfo Ísland undir samning um að Sparisjóði Ólafsfjarðar tæki að sér vinnslu verkefna fyrir Creditinfo Ísland. Áætlað að þessi verkefni skapi 2-4 ný störf í Sparisjóði Ólafsfjarðar, en reiknað er með að þeim geti fjölgað í framtíðinni og til greina kemur að sparisjóðurinn taki að sér vinnslu verkefna fyrir fyrirtæki Creditinfo Group erlendis. Með í för voru forráðamenn Sparisjóðsins og Creditinfo, bæjarstjóri Fjallabyggðar og fleiri gestir, auk nokkurs fjölda af skíðakrökkum frá Skíðafélagi Ólafsfjarðar sem fengu að nýta ferðina og skíða niður þessa 984 metra.

Aðstæður til undirritunar voru eins og best verður á kosið - veðrið var frábært og útsýnið yfir fjörðinn og fjöllin í kring stórkostlegt. Björn Ólafsson fræddi gesti um staðhætti og landslagið sem fyrir augu bar og kynnti nýtt göngukort með gönguleiðum um Tröllaskaga, en Björn er þekktur fyrir afrek sína á gönguskíðum og faðir eins af okkar bestu skíðamönnum Kristins Björnssonar.

Fyrirtækið Creditinfo Ísland varð til í byrjun árs 2008 þegar Lánstraust og Fjölmiðlavaktin sameinuðu krafta sína. Vörur og þjónusta Creditinfo eru sniðin að þörfum íslensks viðskiptalífs. Fyrirtækið sérhæfir sig m.a. í vanskilaupplýsingum, upplýsingum um fyrirtæki, innheimtu og vaktkerfum eins og fjölmiðlavaktinni, sem margir þekkja. Upplýsingar þær sem aðgengilegar eru hjá Creditinfo eiga að gefa viðskiptavinum tækifæri á auðveldu mati á áhættu viðskipta við bæði fyrirtæki og einstaklinga. Fyrirtækið hefur nú gert samning við Sparisjóð Ólafsfjarðar um að hluti af þeim verkefnum sem fyrirtækið sinnir, verði unnin af Sparisjóði Ólafsfjarðar og starfsmönnum hans.

Eins og allir þekkja hefur flutningur starfa til landsbyggðarinnar verið mikið í umræðunni og hefur ríkið m.a. lofað öllu fögru síðust ár. Hér er hins vegar á ferðinni samningur tveggja einkafyrirtæki sem sjá hag sinni slíku stamstarfi, þrátt fyrir að vegalengdina á milli þeirra.

Þórir Kristinn Þórisson bæjarstjóri Fjallbyggðar var að vonum ánægður með nýju störfin. „Hér er á ferðinni frábær samvinna tveggja öflugra fyrirtæka sem við getum verið stolt af. “