Skipulags- og umhverfisnefnd Fjallabyggðar

Lögð fram til afgreiðslu tillaga að Svæðisskipulagi Eyjafjarðar.

Í Svæðisskipulagi Eyjafjarðar 2012-2024 er sett fram sameiginleg stefna aðildarsveitarfélaganna um byggðaþróun og þá þætti landnotkunar sem talin er þörf á að samræma vegna sameiginlegra hagsmuna sveitarfélaganna. Skipulagstillagan er unnin með samanburði skipulagskosta m.t.t. umhverfis og samfélags í samræmi við ákvæði laga um umhverfismat áætlana. Hlutverk Svæðisskipulagsnefndar Eyjafjarðar er auk þess að vinna tillögu að svæðisskipulagi að sjá um framfylgd þess og breytingar á því í samræmi við 9. gr. skipulagslaga nr. 123/2010.
Sveitarstjórnum ber að sjá til þess að aðalskipulag sveitarfélaga verði í samræmi við svæðisskipulagið þegar það hefur fengið endanlega samþykkt.

Nefndin samþykkir framkomna tillögu að Svæðisskipulagi Eyjafjarðar 2012-2024.

Lagðir fram að nýju aðaluppdrættir, Teiknistofunnar Víðihlíðar 45,  af viðbyggingu við grunnskólann á Siglufirði. Uppdrættirnir voru grenndarkynntir fyrir hagsmunaaðilum að Eyrargötu 2, 3, 4, 6, 7 og 8.
Þrjár athugasemdir bárust; frá Advel lögmenn f.h. Sögu ráðgjafar ehf., eiganda hússins nr. 3 við Eyrargötu, Eiríksínu og Ólafíu, eigendum Eyrargötu 2 og Sigurlaugu Guðjónsdóttir, Þóri J. Stefánssyni, Sigríði Ólafsdóttir, Guðbrandi J. Ólafssyni og Pálínu Pálsdóttir f.h. Sálarrannsóknarfélagsins, eigendum, húsa nr. 4, 7 og 8 við Eyrargötu. Lögð fram umsögn Landslaga slf. um athugasemdir, dags. 5. febrúar 2013.

Með vísan til samþykktar bæjarráðs frá 5. febrúar 2013, um að unnið skuli deiliskipulag af reitnum og með vísan til umsagnar Landslaga, dags. 5. febrúar 2013, sem samþykkt er af nefndinni, er hinni kynntu tillögu vísað til vinnu um gerð deiliskipulags af reitnum sbr. lið nr. 3 í fundargerð þessari þar um.

Lögð fram bókun bæjarráðs frá 5. febrúar 2013, ásamt greinargerð, um gerð deiliskipulags af svokölluðum grunnskólareit:

"Bæjarráð felur skipulags- og umhverfisnefnd, í samvinnu við Landslag/Ómar Ívarsson, að vinna deiliskipulag af lóð Grunnskóla Fjallabyggðar á Siglufirði og götureitsins sem skólinn stendur á.
Í skipulagsvinnunni verði m.a. skoðað skuggavarp fyrirhugaðrar viðbyggingar við skólann og bílastæðamál og haft samráð við hagsmunaaðila eins og skipulagslög gera ráð fyrir. Deiliskipulagið sé í fullu samræmi við aðalskipulag Fjallabyggðar."

Greinargerð með tillögu:
- Árið 1994 ákvað bæjarstjórn Siglufjarðar að láta teikna heilstæðan grunnskóla á þessum stað.
- Skólann átti að byggja í áföngum og vera einsetinn skóli í samræmi við lög og reglur.
- Lögð var áhersla á að byggingin væri í samræmi við götumynd, byggðamynstur og þéttleika byggðar.
- Ráðist var í fyrsta áfanga á árinu 1996 og var sá hluti tekinn í notkun 1999.
- Til að ná markmiðum sínum hafði verið ákveðið að stækka lóð skólans og fækka lóðum á umræddum lóðarreit og húsum og halda þar með þéttleika byggðar.
Sameining sveitarfélaga á Tröllaskaga varð að veruleika í júní 2006.
Í samræmi við þessa stefnu voru eftirfarandi lóðir á Siglufirði sameinaðar lóð grunnskólans árið 2007:
- Norðurgata 6 og 8.
- Vetrarbraut 3, 5, 7 og 9.
- Eyrargata 1 og 5.
Í Aðalskipulagi Fjallabyggðar sem gildir frá 2008 - 2028 hefur lóð grunnskólans verið afmörkuð sem svæði fyrir þjónustustofnanir, þar með eru fyrr nefndar lóðir sem og lóð nr. 3 við Eyrargötu.
Eftir sameiningu sveitarfélaganna kom fljótlega í ljós að ekki væri þörf á svo mikilli uppbyggingu í báðum bæjarkjörnum m.a. vegna fækkunar í árgöngum beggja vegna. Unnið var að framtíðarskipan skólamála í nýju umhverfi á árunum 2008 - 2009. Framtíðarskipan fræðslumála var samþykkt í bæjarstjórn fimmtudaginn 21. janúar 2010. Nú liggur fyrir að ekki er þörf á verulegum stækkunum í sameinuðu sveitarfélagi miðað við núverandi íbúafjölda. Kynningarfundur um fyrirhugaðar stækkanir fór fram í júní á árinu 2011. Niðurstaðan er að eitt skólahús skyldi vera á Siglufirði og eitt á Ólafsfirði.
Uppbygginu á Ólafsfirði er nú lokið í samræmi við þessar hugmyndir. Hins vegar á eftir að byggja verknámsstofur og mötuneyti fyrir nemendur á Siglufirði. Ætlunin var að hefja framkvæmdir sem fyrst á árinu 2013 og hefur tillaga að viðbyggingu verið hönnuð. Tillagan var grenndarkynnt hagsmunaaðilum og bárust nokkrar athugasemdir.
Í ljósi athugasemda verður að telja eðlilegt að skoða betur deiliskipulag reitsins.
Bæjarráð telur að við þá vinnu verði tekið mið af núverandi húsnæðisþörf grunnskólans. Vísast hér í samþykkt bæjarstjórnar frá 14. september 2011.
Bæjarráð telur þar með ekki rétt að ráðast í eins viðamiklar framkvæmdir og teikningar frá 1994 gerðu ráð fyrir. Verði síðar þörf á stækkun s.s. vegna fjölgunar eða breyttra aðstæðna verði deilskipulagið aftur tekið til endurskoðunar.
Vegna fyrirhugaðrar viðbyggingar, við grunnskólann á Siglufirði, er rétt að taka fram að á lóðinni Eyrargötu 1 stóð hús sem bæjarfélagið lét rífa.
Það hús bar nafnið "Rauða myllan". Húsið var tveggja hæða og var nánast í sömu fjarlægð frá Eyrargötu 3 og fyrirhuguð viðbygging kemur til með að rísa.

Bæjarráð felur jafnframt skipulags- og umhverfisnefnd að höfðu samráði við arkitekta og Landslög/Ívar Pálsson að svara framkomnum athugasemdum.

Einnig lögð fram tillaga Landslags ehf., dags. 5.2.2013, að skipulagslýsingu fyrir reitinn.

Skipulags- og umhverfisnefnd samþykkir að fela Landslagi/Ómar Ívarsson, að vinna tillögu að deiliskipulagi af lóð Grunnskóla Fjallabyggðar á Siglufirði og götureitsins sem skólinn stendur á. Í skipulagsvinnunni verði m.a. skoðað skuggavarp fyrirhugaðrar viðbyggingar við skólann og bílastæðamál og haft samráð við hagsmunaaðila eins og skipulagslög gera ráð fyrir.

Deiliskipulagið sé í fullu samræmi við Aðalskipulag Fjallabyggðar.

Jafnframt er samþykkt að leita umsagnar Skipulagsstofnunar um fyrirliggjandi tillögu að skipulagslýsingu og kynna hana fyrir almenningi.

Lagt fram erindi frá Samorku þar sem tilkynnt er að aðalfundur samtakanna verður haldinn föstudaginn 22. febrúar 2013. Er óskað eftir að tilkynning um þátttöku á fundinum verði send eigi síðar en 18. febrúar næstkomandi.

Nefndin samþykkir að deildarstjóri tæknideildar sitji fundinn.

Lögð fram tillaga frá tæknideild um að lóðunum Hlíðarvegur 7 og Snorragata 9b verði eytt, þar sem búið er að leggja þær undir götu.

Erindi samþykkt.

Lögð fram til kynningar teikning af fyrirhuguðu húsi við Hafnargötu 4.

Nefndin setur sig ekki á móti útliti hússins, en bendir á að grenndarkynna þarf byggingarleyfisumsókn þegar hún berst.

Lagðar fram til kynningar athugasemdir íbúa í grennd við Aðalgötu 6 og 6b þar sem þeir lýsa yfir miklum áhyggjum af ástandi húsanna, Aðalgötu 6 og 6b eftir óveðrið sem gekk yfir í lok janúar. Múrhúð hrundi af Aðalgötu 6 og þakplötur fuku af Aðalgötu 6b sem skapaði mikla hættu í nágrenninu. Er óskað eftir því að send verði bréf til eigenda fyrrgreindra fasteigna þar sem þeir eru hvattir til að gera nauðsynlegar úrbætur á fasteignum sínum.

Tæknideild hefur sent eigendum Aðalgötu 6 og 6b úrbótabréf, þar sem þeim er gefinn frestur til þess að gera nauðsynlegar úrbætur á fasteignum sínum ella muni verða lagðar dagsektir á þá skv. gr. 2.9.2. í byggingarreglugerð nr. 112/2012.

Lagt fram til kynningar.