Fjárhagsáætlun 2022 - Seinni umræða

Málsnúmer 2109058

Vakta málsnúmer

Bæjarráð Fjallabyggðar - 723. fundur - 09.12.2021

Fram eru lögð drög að fjárhagsáætlun 2022 og þriggja ára áætlun vegna 2023 til 2025, einnig er lagt fram minnisblað deildarstjóra stjórnsýslu og fjármála hvar tilgreindar eru leiðréttingar og smávægilegar breytingar sem gerðar hafa verið frá fyrri umræðu í bæjarstjórn.
Vísað til afgreiðslu bæjarstjórnar
Bæjarráð samþykkir framlagða fjárhagsáætlun og vísar henni til seinni umræðu í bæjarstjórn, einnig þakkar bæjarráð starfsfólki sveitarfélagsins fyrir vandaða og góða vinnu við gerð framlagðrar fjárhagsáætlunar.

Bæjarstjórn Fjallabyggðar - 208. fundur - 15.12.2021

Til máls tóku: Helga Helgadóttir, Elías Pétursson og Jón Valgeir Baldursson.
Samþykkt
Síðari umræða um fjárhagsáætlun 2022.

Til máls tóku: Elías Pétursson, Helga Helgadóttir, Jón Valgeir Baldursson, Tómas Einarsson, Helgi Jóhannsson og S. Guðrún Hauksdóttir.

Helga Helgadóttir forseti bæjarstjórnar lagði fram eftirfarandi bókun fyrir hönd bæjarstjórnar:

Í fjárhagsáætlun Fjallabyggðar fyrir árið 2022 er líkt og áður leitast við að bæta hag barnafjölskyldna og efla starfsemi sem snýr að börnum, ungmennum og eldri borgurum. Frístundastyrkir til barna fæddra 2004 - 2018 verða hækkaðir, sveitarfélagið bætir í styrk til UÍF vegna barna- og unglingastarfs og í leik- og grunnskóla verður fjármagn áfram sett í þróunarstarf. Unnið verður að því að efla sveitarfélagið sem aldursvænt samfélag m.a. með því að vinna að verkefni sem snýr að því að auka fjölbreytni í þjónustu við aldraða. Líkt og áður verður unnið að Heilsueflandi samfélagi og í anda þess verður áfram gjaldfrjálst í sund og rækt fyrir eldri borgara og öryrkja. Einnig verður áfram staðið að öflugri uppbyggingu innviða samfélagsins sem og viðhaldi eigna.
Almennt munu gjaldskrár hækka um 2,4% sem er nokkru minna en nýjasta þjóðhagsspá gerir ráð fyrir, í henni er gert ráð fyrir 3,3% hækkun verðlags á komandi ári.

Eftirfarandi eru helstu niðurstöður áætlunar:

Áætlaður rekstrarhagnaður bæjarsjóðs fyrir árið 2022 er 48 millj.kr.
Rekstrarafkoma samstæðu, fyrir afskriftir og fjármagnsliði, er áætluð jákvæð um 263,3 millj.kr.
Útsvarsprósenta er 14.48% og álagningarprósenta fasteignagjalda er óbreytt á milli ára.
Skatttekjur ársins 2022 eru áætlaðar 1.542 millj.kr., en útkomuspá ársins 2021 er 1.415 millj.kr.
Heildartekjur 2022 verða 3.432 millj.kr., en eru áætlaðar 3.205 millj.kr. í útgönguspá 2021.
Gjöld ársins 2022 eru áætluð 3.167 millj.kr., en eru 2.961 millj.kr. fyrir árið 2021.
Heildareignir sveitarfélagsins eru áætlaðar 6.122 millj.kr. og eigið fé er 3.985 millj.kr. eða 65% eiginfjárhlutfall.
Skuldaviðmið bæjarsjóðs er áætlað 32,5% fyrir 2022.
Vaxtaberandi skuldir eru 300 millj.kr., en voru 326 millj.kr. árið 2021.
Veltufé frá rekstri er áætlað 372 millj.kr., sem eru 10,8% af rekstrartekjum.

Á komandi ári er áætlað að fjárfestingar nemi 617 millj.kr. og verða þær fjármagnaðar með handbæru fé.

Í framkvæmdaáætlun komandi árs bera eftirfarandi verkefni hæst:

Íþróttamiðstöðin á Siglufirði - viðbygging, bætt aðgengi fyrir fatlaða og nýir búningsklefar.
Nýtt húsnæði fyrir félagsmiðstöðina NEON.
Íþróttamiðstöð Ólafsfirði, endurnýjun á búningsaðstöðu.
Nýtt aðstöðuhús á tjaldsvæðið í Ólafsfirði.
Umhverfisúrbætur á svæði vestan Óskarsbryggju á Siglufirði.
Bætt umferðaröryggi og ásýnd Aðalgötu í Ólafsfirði.
Gatnagerð og malbikun nýrra gatna á Siglufirði og í Ólafsfirði.
Áframhald úrbóta á frárennsliskerfi beggja byggðarkjarna.
Áframhald endurnýjunar götulýsingar, LED-væðing.
Endurnýjun gangstétta og gerð nýrra göngustíga.

Breytingar á gjaldaliðum fasteignagjalda verða með eftirfarandi hætti:
Fasteignaskattur fyrir íbúðarhúsnæði A-flokkur verður óbreyttur í 0,48.
Gjalddagar fasteignagjalda verða áfram tíu, febrúar til nóvember.
Afsláttur á fasteignaskatti fyrir eldri borgara og öryrkja verður óbreyttur 70.000 kr.

Einnig verða tekjuviðmið vegna afsláttar á fasteignaskatti fyrir eldri borgara og öryrkja hækkuð um verðlagsþróun og verða sem hér segir:

Tekjumörk eru sem hér segir:
Flokkur - Einstaklingar - Afsláttur
1. 0 - 3.380.000 - 100%
2. 3.380.001 - 4.000.000 - 75%
3. 4.000.001 - 4.640.000 - 50%
4. 4.640.001 - 5.275.000 - 25%
5. 5.275.001 - - 0%

Flokkur - Hjón/Sambýlisfólk - Afsláttur
1. 0 - 5.120.000 - 100%
2. 5.120.001 - 5.940.000 - 75%
3. 5.940.001 - 6.560.000 - 50%
4. 6.560.001 - 7.170.000 - 25%
5. 7.170.001 - - 0%

Að lokum vill forseti, fyrir hönd bæjarstjórnar, koma á framfæri þökkum til bæjarstjóra og starfsmanna bæjarfélagsins fyrir þeirra aðkomu að gerð fjárhagsáætlunar og ánægjulegt samstarf í krefjandi árferði og óskar íbúum gleðilegra jóla og farsældar á nýju ári.


Bæjarstjóri fór yfir helstu niðurstöður áætlunar og leiðréttingar sem gerðar hafa verið á milli umræðna, að því loknu lagði bæjarstjóri fram eftirfarandi bókun:

Þegar sá sem hér stendur lagði fram bókun af sama tilefni í fyrra þá var reiknað með því að faraldur sá sem þá herjaði á heiminn myndi láta undan síga mánuðina á eftir, svo varð ekki. Enn erum við að glíma við samkomutakmarkanir og aðrar afleiðingar pestarinnar sem hafa áhrif á rekstur sveitarfélagsins þó svo að áhrifin séu um sumt minni en spár gerðu ráð fyrir. Eigi að síður hefur árið verið nokkuð krefjandi og líkur á að hið næsta verði það einnig, horfandi til þess þá er það fagnaðarefni hve staða sveitarfélagsins er sterk, skuldir litlar og innviðir öflugir. Fjárhagsáætlun sú sem hér er til umræðu ber öll merki varkárni og yfirvegunar þeirra er að hafa komið, hið sama á við um þriggja ára áætlun sveitarfélagsins. Á sama tíma ber áætlunin, og þá kannski sérstaklega metnaðarfull framkvæmdaáætlun, vitni um styrkleika sveitarfélagsins og þann kraft sem í því býr. Kraftur samfélagsins hér í Fjallabyggð, sterkir innviðir og öflugt atvinnulíf veita mér fullvissu um að við getum horft björtum augum til framtíðar og að komandi ár verði sveitarfélaginu farsælt.

Að lokum vil ég þakka öllu starfsfólki Fjallabyggðar fyrir óeigingjarnt starf í þágu sveitarfélagsins og bæjarstjórn allri fyrir traust og samstarf á árinu sem nú fer að ljúka.


Jón Valgeir Baldursson hvað sér hljóðs og lagði fram eftirfarandi bókun f.h. H-listans.

Hér liggur fyrir bæjarstjórn að samþykkja fjárhagsáætlun fyrir árið 2022. H-listinn hefur komið að gerð áætlunarinnar á tveimur vinnufundum bæjarstjórnar, bæjarráðs og í nefndum. Ánægjulegt er að sjá að fjárhagsstaða Fjallabyggðar er mjög sterk og hægt að fara í framkvæmdir fyrir rúmar 600 milljónir og viðhaldsverkefni fyrir rúmar 100 milljónir án þess að fara þurfi í lántökur.
Við lögðum fram okkar áherslur fyrir meirihlutann sem að hluta rataði inn í lokaniðurstöðuna á framkvæmdaáætlun. Þó voru nokkur verkefni sem ekki fengu brautargengi nú og þar má helst nefna áframhaldandi vinnu við nýtt tjaldsvæði á Leirutanga, endurbætur á Ólafsvegi 4 og framtíðarnýtingu, ráðningu á umhverfisfulltrúa (náttúru- og umhverfisfræðingi), Skriðustígur á Siglufirði (Heiðarvegur) og skoðun á framtíðarhúsnæði fyrir Golfklúbb Fjallabyggðar sem jafnframt gæti nýst allt árið um kring. H - listinn leggur mikla áherslu á að þær framkvæmdir sem fyrirhugaðar eru á næsta ári komi sem fyrst til framkvæmda eða boðin út svo koma megi í veg fyrir að framkvæmdir falli niður eða færist milli ára.

Að lokum vill H - listinn þakka öllum þeim sem komu að gerð fjárhagsáætlunarinnar fyrir þeirra vinnu. Gleðileg jól og gleðilegt nýtt ár.


Fjárhagsáætlun 2022 og þriggja ára áætlun borin undir atkvæði.

Framlögð áætlun samþykkt með 7 samhljóða atkvæðum.