Skipulags- og umhverfisnefnd Fjallabyggðar - 139

Valgeir Tómas Sigurðsson óskar eftir leyfi til endurgerðar og útlitsbreytinga á húseigninni Aðalgötu 2, Siglufirði skv. meðfylgjandi greinargerð og teikningu.

Jóhann Helgason, Vesturgötu 14 Ólafsfirði, kemur á framfæri í erindi sínu áhyggjum hvað varðar hnignun á ásýnd sveitarfélagsins, þá sérstaklega í Ólafsfirði og óskar eftir því að bæjarráð hlutist um að beina því til fyrirtækja og einstaklinga að viðhalda eignum sínum og hirða um lóðir sínar.

Beri það ekki árangur þá hjóti sveitarfélagið að grípa til þeirra aðgerða sem það hefur svigrúm til samkvæmt samþykktum lögum og reglugerðum, meðal annars til þess að gæta jafnræðis meðal íbúanna.

Nefndin þakkar erindið og bendir á að búið er að senda bréf til allra fyrirtækja í sveitarfélaginu þar sem þau eru hvött til þess að halda sínum svæðum ávallt snyrtilegum og hreinum.

Sýslumaðurinn á Siglufirði óskar eftir umsögn vegna umsóknar um rekstrarleyfi til handa Þóri Kr. Þórissyni f.h. 580 slf. vegna reksturs gististaðanna The Herring house að Hávegi 5 og Hlíðarvegi 1 á Siglufirði.

 

Þar sem um nýja staði er að ræða er sótt um nýtt rekstrarleyfi gististaðar skv. II. flokki 5 gr. laganna, en nánar tiltekið er um að ræða gistingu í íbúðum án veitinga.

 

Með vísan til 10. gr. laga nr. 85/2007, er þess hér með farið á leit að byggingarfulltrúi staðfesti að starfsemin sé í samræmi við byggingarleyfi og skipulagsskilmála sem og að lokaúttekt hafi farið fram á húsnæðinu og staðfestar teikningar liggi fyrir.

 

Byggingarfulltrúa falið að svara erindinu.

Sýslumaðurinn á Siglufirði óskar eftir umsögn vegna umsóknar um rekstrarleyfi til handa Bjarkey Olsen Gunnarsdóttur f.h. Iðngarða Siglufjarðar ehf. vegna reksturs Gistihúss Jóa að Strandgötu 2, Ólafsfirði.

 

Þar sem um nýjan stað er að ræða er sótt um nýtt rekstrarleyfi gististaðar skv. III. flokki 5 gr. laganna, en nánar tiltekið er um að ræða gistiheimili með veitingum þó ekki áfengisveitingum.

 

Með vísan til 10. gr. laga nr. 85/2007, er þess hér með farið á leit að byggingarfulltrúi staðfesti að starfsemin sé í samræmi við byggingarleyfi og skipulagsskilmála sem og að lokaúttekt hafi farið fram á húsnæðinu og staðfestar teikningar liggi fyrir.

 

Byggingarfulltrúa falið að svara erindinu.

Lagður fram lóðarleigusamningur vegna stækkunar á lóðinni við Norðurgötu 16.

 

Erindi samþykkt.

Umhverfisráðuneytið hefur að undarförnu unnið að útgáfu landsáætlunar um meðhöndlun úrgangs 2013-2024. Samkvæmt 3. mgr. 4. gr. laga nr. 55/2003 um meðhöndlun úrgangs gefur ráðherra út til tólf ára í senn almenna áætlun um meðhöndlun úrgangs sem gildir fyrir landið allt.

Ráðuneytið gaf síðastliðið haust almenningi, stjórnvöldum og hagsmunaaðilum kost á að koma sjónarmiðum sínum á framfæri varðandi efni landsáætlunar um meðhöndlun úrgangs. Samhliða fundaði ráðuneytið með fjölmörgum aðilum um fyrirhugaða landsáætlun um úrgang. Ráðuneytið hefur nú unnið úr framkomnum hugmyndum og gert drög að landsáætlun um úrgang.

Hér með er yður veittur kostur á að koma með ábendingar og athugasemdir varðandi drög að landsáætlun um meðhöndlun úrgangs 2013-2024. Óskað er eftir að umsögn berist ráðuneytinu eigi síðar en 15. ágúst 2012.

Drög að landsáætluninni má finna á vefsíðu ráðuneytisins, www.umhverfisraduneyti.is og vefsíðu Umhverfisstofnunar, www.umhverfisstofnun.is.

Lagt fram til kynningar.