Bæjarstjórn Fjallabyggðar

Því næst lagði forseti fram tillögu meirihluta Framsóknarflokks og Sjálfstæðisflokks að ráðningarsamningi við Sigurð Val Ásbjarnarson og að forseta bæjarstjórnar yrði falið að undirrita samninginn fyrir hönd Fjallabyggðar.
Til máls tóku Jón Hrói Finnsson, Ólafur H. Marteinsson og Bjarkey Gunnarsdóttir.
Jón Hrói Finnsson las upp eftirfarandi bókun.
Undirritaðir fulltrúar S og T-lista geta ekki stutt ráðningu bæjarstjóra á þeim forsendum sem fram koma í fyrirliggjandi drögum að ráðningarsamningi. Á síðastliðnu kjörtímabili voru fastir akstursstyrkir starfsmanna felldir niður, fastar yfirvinnugreiðslur skertar og störf lögð niður til að lækka launakostnað. Á slíkum tímum þykir okkur afar óeðlilegt að hækka launakostnað vegna bæjarstjóra eins mikið og gert er ráð fyrir í fyrirliggjandi drögum að ráðningarsamningi.
Við gerum athugasemdir við húsnæðisfríðindi, fastar dagpeningagreiðslur og risnu til handa bæjarstjóra. Í okkar huga eiga stjórnendur að bera húsnæðiskostnað og annan framfærslukostnað sjálfir eins og aðrir launþegar. Okkur þætti jafnframt eðlilegt að greitt yrði fyrir akstur á eigin bifreið, ferða- og uppihaldskostnað á ferðalögum og risnu samkvæmt uppgjöri frekar en að festa slíka liði í launasamningi. Við getum enn fremur ekki samþykkt að bæjarstjóri haldi þessum greiðslum fyrir starfstengdan kostnað eftir að hann lýkur störfum.