Fréttir & tilkynningar

10 ára afmæli Leikskála

Í tilefni 10 ára afmælis Leikskála var haldið hóf í húsakynnum leikskólans þriðjudagskvöldið 30. september. Þar voru starfsmenn og foreldrar leikskólans ásamt hópi fólks og/eða fulltrúum frá þeim stofnunum sem leikskólinn er í daglegu eða reglulegu samstarfi við. Í tilefni þessara tímamóta var gefin út skólanámskrá og formlega opnuð heimasíða leikskólans. Tengill síðunnar er www.siglo.is/leikskoliAmælisdagur leikskólans er hins vegar 29. ágúst og þann dag var haldin barnvæn veisla í leikskólanum með börnum og starfsfólki. Söngur, kökur, glens og gaman.
Lesa meira

Síldarminjasafnið kynnt erlendis

Nýlega tók Chris Bogan, starfsmaður Síldarminjasafnsins, þátt í alþjóðlegri safnaráðstefnu í Dubrovnik í Króatíu. Ráðstefnan nefnist ‘The Best In Heritage’ og til hennar er aðeins boðið virtum ,,verðlaunasöfnum” til að kynna starfsemi sína og einnig til að leggja grunn að alþjóðlegum tengslum og samstarfi. Í lok ráðstefnunnar velja ráðstefnugestir besta fyrirlesturinn sem hlýtur sérstök heiðursverðlaun. Nokkuð á annað hundrað manns frá 30 löndum sátu ráðstefnuna að þessu sinni og fylgdust í þrjá daga með 22 kynningum á hinum margvíslegustu söfnum, allt frá Síldarminjasafninu til The Museum of Civilization í Quebec, Kanada (þar sem starfsmenn eru fleiri en íbúar Siglufjarðar!) eða hins nýja og glæsilega safns, The Imperial War Museum í Manchester. Sem ,,besta kynningin” var valið Rotorua safnið í Nýja Sjálandi. Athyglin á Siglufirði.Í erindi sínu fjallaði Chris um uppbyggingu Síldarminjasafnsins og þýðingu þess að fá Íslensku safnverðlaunin árið 2000 og tilnefningu til Evrópsku safnverðlaunanna 2004. Að sögn Chris vakti kynning hans mikla athygli og ekki síst hjá Króötum sem eru í mikilli safnauppbyggingu við erfiðar aðstæður. ,,Saga Síldarminjasafnsins hljómaði greinilega eins og fyrirmynd að því hvernig hægt er að byggja eitthvað mikilvægt og glæsilegt fyrir staðinn og jafnvel alla þjóðina. Sérstaklega voru stúdentar í safnafræðum við Háskólann í Zagreb áhugasamir um reynslu okkar”. Þess má ennfremur geta að Króatíska sjónvarpið tók viðtal við Chris um stöðu Síldarminjasafnsins.Annað sæti?Þótt ekki hafi verið veitt verðlaun fyrir annað og þriðja sæti í safnakynningunni – segir í stórri grein í Vjesnik, eins stærsta dagblaðs Króatíu – var fyrirlesturinn um Síldarminjasafnið á Siglufirði ekki síður áhrifamikill en verðlaunafyrirlesturinn og hefði tvímælalaust á skilið önnur verðlaun. Þar kom fram hvernig allt er samofið síldinni, safnið, samfélagið, fortíð og framtíð. Með þessari grein í blaðinu fylgdi ein mynd og var hún af Roaldsbrakka. Til þátttöku í ráðstefnunni naut Síldarminjasafnið styrkja frá Menntamálaráðuneytinu, Verkalýðsfélaginu Vöku og Siglufjarðarkaupstað.Örlygur Kristfinnsson
Lesa meira

Fyrirtækjakeppni Glæsis 2003.

Firmakeppni hestamannafélagsins Glæsis fór fram á íþróttavelli félagsins á bökkum Hólsár Laugardaginn 20. september og hófst klukkan 15,00.Dómarar mótsins voru. Gunnar Guðmundsson og Halldór Þorvaldsson. Að þessu sinni tóku 52 fyrirtæki þátt, sem er mun meiri þátttaka en áður hefur verið. Dregið var um keppanda fyrir hvert fyrirtæki fyrir sig.Fyrirtækjakeppnin er liður í átaki Glæsisfélaga til að gera skeiðbraut við íþróttavöll félagsins á bökkum Hólsár, sem gjörbreytir aðstæðum til mótahalds og gerir ágætt mótasvæði enn betra.Keppnin fór þannig fram að riðnir voru tveir hringir tölt eða brokk og voru þrír inná vellinum í einu og sá sem hafði bestu einkunnina hélt áfram keppni í seinni umferðum, þannig hélt mótið áfram þangað til að sex kepptu til úrslita. Hestamannafélagið Glæsir vill koma á framfæri þakklæti til allra sem studdu okkur í þessu átaki okkar.Sigurvegari varð Trésmíðaverkstæði Ólafs Kárasonar, keppandi fyrir hann var Haraldur Marteinsson á hestinum Glampa,Í öðru sæti varð Vélaleiga Stefáns Einarssonar, keppandi fyrir hann var Katrín Haraldsdóttir á stóðhestinum SkorraÍ þriðja sæti varð Siglfirðingur ehf, keppandi fyrir hann var Ólafur Marteinsson á hestinum Korg.Að lokinni firmakeppninni var keppt til úrslita í barna og unglingaflokki.1. Brynhildur Ólafsdóttir á hestinum Blesa hún keppti fyrirGuðrúnu Maríu fiskverkun. 2. Hilmar Snær Símonarson á hestinum Kela hann keppti fyrir Sundhöll Siglufjarðar.3. Vigfús Rúnarsson á hestinum Vini hann keppti fyrir Heilbrigðisstofnun Siglufjarðar. Að loknu mótahaldi fór fram svonefnd kvennareið, þessi dagskrárliður var undir stjórn þeirra Helgu Lúðvíksdóttur og Kolbrúnar Gunnarsdóttur.Mjög góð mæting var þrátt fyrir að veðrið væri nokkuð hvasst, að lokinni kvennareiðinni var haldin uppskeruhátíð hestamanna sem stóð fram á kvöld.
Lesa meira

Stórtónleikar í Siglufjarðarkirkju.

Laugardaginn 27. september kl. 20:30 munu söngstjörnurnar Sigrún Hjálmtýsdóttir, Gunnar Guðbjörnsson og Kristinn Sigmundsson, ásamt Jónasi Ingimundarsyni, píanóleikara, halda stórtónleika í Siglufjarðarkirkju. Á efnisskránni verða vinsælar aríur, dúettar og terzettar úr þekktum óperum eftir Mozart, Gounod, Bizet og Puccini, svo og íslensk sönglög eftir Sigfús Einarsson, Sveinbjörn Sveinbjörnsson, Sigvalda Kaldalóns, Markús Kristjánsson, Emil Thoroddsen og Bjarna Thorsteinsson. Miðaverð: 2.500 kr.Það er óþarfi að kynna þessa frábæru listamenn, sem nánast allir landsmenn þekkja og fullvíst að það verður enginn svikinn af að hlýða á þá.Það er full ástæða til að hvetja Siglfirðinga til að fjölmenna á þessa tónleika því það er ekki daglegur viðburður að svona góðir listamenn sæki okkur heim.
Lesa meira

Þjónustuhús við höfnina - tillaga í bæjarráði.

Á fundi bæjarráðs Siglufjarðar þann 28. ágúst s.l. var eftirfarandi tillaga samþykkt:“Bæjarráð Siglufjarðar samþykkir að láta kanna möguleika á því að reka þjónustuhús við höfnina. Kannaðir verði möguleikar á að byggja húsnæði eða kaupa húsnæði sem hentar fyrir þjónustuna. Hugmyndin er sú að í slíku húsnæði verði aðstaða fyrir aðgerð á fiski, verkum grásleppuhrogna, beitingaaðstaða og kælir fyrir fisk. Bæjarráð samþykkir að fela Hafnarstjóra og atvinnufulltrúa að fylgja málinu eftir í Hafnarstjórn og koma nauðsynlegri vinnu af stað hið fyrsta.”Greinargerð:Í sumar hefur nokkuð mikið borið á því að bátar hafa sótt til Siglufjarðar til að gera út á línu og handfæri. Aðstaða fyrir þá aðkomubáta og heimabáta sem héðan gera út er af skornum skammti og vantar tilfinnanlega bætta aðstöðu. Með tilkomu jarðganga á milli Siglufjarðar og Eyjafjarðarsvæðisins innan fárra ára er ljóst að auknir möguleikar skapast fyrir útgerð aðkomubáta frá Siglufirði og er rétt að Siglufjarðarhöfn verði þá tilbúin fyrir aukin umsvif jafnt heimabáta og þeirra báta sem gera héðan út tímabundið.” Hafnarstjórn hefur tekið vel í þessar hugmyndir um athugun á rekstri þjónustuhúss við höfnina og hefur Hafnarstjóra verið falið að skoða málið í samráði við atvinnumálafulltrúa.
Lesa meira

Framkvæmdir við Siglufjarðarhöfn

Framkvæmdir hafa gengið vel við Roaldsbryggju og er verkinu nú lokið. Búið er að steypa landgang við væntanlegan nýjan vesturkant í smábátahöfninni en einhver frestun verður á frekari framkvæmdum þar sem seinkun hefur orðið á afhendingu hluta harðviðarins sem Siglingastofnun pantaði til verksins. Timbrið er væntanlegt samkvæmt nýjustu upplýsingum ekki síðar en 20. september n.k.Gert er ráð fyrir að framkvæmdum við vesturkantinn ljúki síðar í haust.
Lesa meira

Hugmynd um prentminjasafn.

Að frumkvæði Sigurjóns Sæmundssonar, fyrrverandi prentsmiðjustjóra, hefur vaknað hugmynd um að setja á fót prentminjasafn á Siglufirði. Sigurjón á mikið af gömlum munum er tengjast prentiðnaði á Íslandi og hefur m.a. aldrei hent neinu af gömlum vélbúnaði og hlutum tengdum prentiðninni, þó endurnýjun vegna tækniþróunar hafi verið ör í gegn um tíðina hjá Siglufjarðarprentsmiðju.Sótt hefur verið um lóðir undir safnið og var samþykkt í bæjarráði Siglufjarðar í gær að leigja Sigurjóni tvær lóðir fyrir safnið.
Lesa meira

Garðaverðlaun 2003 afhent.

Afhending verðlauna fyrir snyrtileg og fallegt umhverfi fór fram 13. ágúst s.l. Viðurkenningar fyrir fallegt umhverfi 2003 hlutu eigendur tveggja garða, þ.e. Laugarvegi 35, Sveinn Ástvaldsson og Sigríður Skarphéðinsdóttir og Fossvegi 9, Hörður Júlíusson og Sigurlaug Hauksdóttir. Garðarnir eru mjög snyrtilegir og mikil vinna liggur að baki þeim báðum. Mikill hæðarmismunur er frá götunni í þeim báðum og er leystur á skemmtilegan hátt í báðum görðunum með grjóti og timburveggjum. Mikið úrval er af bæði fjölærum og trjákenndum plöntum og áberandi fallegt gras á báðum stöðum. Viðstaddir voru Bæjarstjórinn Guðmundur Guðlaugsson, Arnar Heimir Jónsson garðyrkjufræðingur, ásamt dómnefnd, svo og verðlaunahafar.
Lesa meira