Beiðni Leyningsáss ses um frestun framkvæmda við Skarðsveg

Lagt fram erindi Vegagerðarinnar dags. 11.06.2020, þar sem fram kemur að Vegagerðinni hefur borist erindi Valtýs Sigurðssonar stjórnarformanns f.h. Leyningsás ses. þar sem óskað er eftir því að hlé verði gert á vegaframkvæmdum í Skarðsdal á meðan málið verður skoðað í heild af hagsmuna- og fagaðilum. Afrit var sent á Elías Pétursson bæjarstjóra og stjórnarmann í Leyningsás ses.. Vegagerðin er bundin samningi við verktaka sem tók að sér framkvæmd verksins árið 2017 og er verktaki að undirbúa lokaframkvæmdir eftir vetrarhlé.

Vegagerðin óskar eftir afstöðu Fjallabyggðar til erindis Leyningsás ses. sem allra fyrst, þar sem Fjallabyggð er landeigandi, stóð fyrir deiliskipulagi og veitti framkvæmdaleyfi.

Einnig lagt fram erindi Valtýs Sigurðssonar formanns stjórnar f.h. Leyningsás ses. dags. 02.06.2020.

Bæjarráð samþykkir að fela bæjarstjóra að vinna umsögn og leggja fyrir bæjarráð.

Á 656. fundi bæjarráðs óskaði ráðið eftir umsögn bæjarstjóra vegna erindis Vegagerðarinnar dags. 11.06.2020, þar sem óskað var eftir afstöðu sveitarfélagsins til erindis Leyningsáss ses. til Vegagerðarinnar, þess efnis að hlé verði gert á vegaframkvæmdum í Skarðsdal á meðan farið er yfir framkvæmdina í heild af hagsmuna- og fagaðilum.

Lögð fram umsögn bæjarstjóra dags. 26.06.2020.

Bæjarráð Fjallabyggðar setur sig ekki upp á móti frestun framkvæmda í Skarðsdal svo fremi að um það náist samkomulag aðila sem að verkinu koma en beinir því til Vegagerðar og Leyningsáss ses. að leitað verði leiða til að ljúka þeim framkvæmdum sem mögulegar eru án þess þó að til lokunar skíðasvæðisins komi. Einnig beinir bæjarráð því til stjórnar Leyningsáss ses. að fram verði sett kostnaðaráætlun vegna flutnings mannvirkja og eða nýbyggingaframkvæmda sem af flutningi skíðasvæðis leiða. Að síðustu vill bæjarráð ítreka og leggja áherslu á nauðsyn þess að Ofanflóðasjóður (ríkisvaldið) komi að þeim kostnaði sem fellur til vegna flutnings skíðasvæðis.