Hátíðarsamþykkt Fjallabyggðar í tilefni 100 ára kaupstaðarafmælis Siglufjarðar

Á hátíðarfundi bæjarstjórnar Fjallabyggðar sem haldinn er í tilefni af 100 ára kaupstaðarafmæli Siglufjarðar, þann 20. maí 2018, samþykkir bæjarstjórn að veita 4 milljónum króna til skógræktar í sveitarfélaginu.
Fjallabyggð er rík af fallegri náttúru og möguleikar til útivistar eru margir og fjölbreytilegir. Undanfarin ár hafa bæjaryfirvöld lagt áherslu á umhverfismál og með samþykktinni vill bæjarstjórn gera enn betur í fegrun umhverfisins. Unnið er að innleiðingu verkefnisins Heilsueflandi samfélag í Fjallabyggð en með því er lögð áhersla á að bæta heilsu og líkamlega, andlega og félagslega líðan íbúa, m.a. með því að hvetja til aukinnar hreyfingar og útivistar.
Í skógræktinni í Skarðsdal hefur Skógræktarfélag Siglufjarðar unnið ötult starf í tæp 80 ár og er ein af helstu náttúruperlum Siglufjarðar, sem margir nýta sér til útivistar. Í samstarfi við Skógræktarfélagið vill bæjarstjórn stuðla að enn frekari uppbyggingu á svæðinu með grisjun, sáningu og gerð göngustíga.
Skeggjabrekkudalur í Ólafsfirði er vinsæll útivistarstaður. Í mynni dalsins er golfvöllur og á veturna er dalurinn mikið nýttur af gönguskíðafólki og vélsleðamönnum. Í samstarfi við Golfklúbb Fjallabyggðar og fagaðila verða gróðursett tré innan golfvallarsvæðisins.

Á hátíðarfundi bæjarstjórnar, sem haldinn var í tilefni af 100 ára kaupstaðarafmæli Siglufjarðar, þann 20. maí sl., var samþykkt að veita 4 milljónum kr. til skógræktar í sveitarfélaginu.

Bæjarráð samþykkir að vísa upphæðinni til viðauka nr.4/2018 við fjárhagsáætlun árið 2018 og að honum sé mætt með lækkun á handbæru fé.

Lagt fram erindi Skógræktarfélags Siglufjarðar dags. 20. september 2018 þar sem félagið þakkar bæjarstjórn gjöf í tilefni 100 ára kaupstaðarafmælis Siglufjarðar þann 20. maí sl. Í erindinu kemur fram að fyrirhugað sé að fara í grisjun skógar í haust og í stígagerð næsta sumar. Einnig kemur fram að félagið hefur bætt við bekkjum og borðum víðs vegar um skóginn ásamt því að koma upp grillaðstöðu í Árhvammi.

Bæjarráð þakkar Skógræktarfélaginu fyrir erindið.