Fréttir

Vegna mikils fannfergis undanfarið er þeim tilmælum beint til húseigenda í Fjallabyggð að moka frá sorptunnum hjá sér fyrir sorphirðudag svo hægt sé að hirða sorp frá heimilum. Ef aðgengi að sorptunn­um er slæmt og íbú­ar hafa ekki sinnt því að greiða götu starfs­fólks sorp­hirðunn­ar, verða tunnur ekki tæmdar. Samkvæmt sorphirðudagatali er verið er að tæma gráar tunnur á Siglufirði í dag 13. janúar og á morgun 14. janúar. Gráa tunnan verður svo tæmd í Ólafsfirði miðvikudaginn 15. janúar nk.

Bæjarstjórn Fjallabyggðar samþykkti 13. desember 2019 að auglýsa tillögu að deiliskipulagi íþróttasvæðis í Ólafsfirði skv. 1. mgr. 41. gr. skipulagslaga nr. 123/2010. Skipulagssvæðið markast af heimkeyrslu að Hornbrekku til suðurs, Ólafsfjarðarvegi/Ægisgötu til vesturs, lóð Menntaskólans á Tröllaskaga og Grunnskóla Fjallabyggðar til norðurs og deiliskipulagi snjóflóðavarna Hornbrekku til austurs.

Nýárskveðja Heilsueflandi Fjallabyggð óskar íbúum Fjallabyggðar gleðilegs nýs árs. Stýrihópur Heilsueflandi samfélags í Fjallabyggð hvetur íbúa til að hlúa að heilsu sinni og heilbrigði á nýju ári sem endranær. Einnig hvetur stýrihópurinn stofnanir og fyrirtæki í sveitarfélaginu til að horfa til heilsueflingar starfsmanna á nýju ári. Á vef Embættis landlæknis má finna bækling um heilsueflingu á vinnustöðum.

Í kjölfar óveðursins sem gekk yfir dagana 10. – 12. desember sl. fer sveitarfélagið þess á leit við bæði íbúa og fyrirtæki Fjallabyggðar sem telja sig hafa orðið fyrir tjóni af völdum veðurofsans eða vegna rafmagnsleysisins að senda upplýsingar um það á netfangið fjallabyggð@fjallabyggd.is. Umbeðnar upplýsingar verða nýttar í greinargerð til átakshóp fimm ráðuneyta og til að gera viðbragðsáætlun fyrir óveður.

Vakin er athygli á að umsóknarfrestur vegna áhersluverkefna fyrir árið 2020 hefur verið framlengdur til 31. janúar 2020. Eyþing auglýsir eftir hugmyndum að áhersluverkefnum fyrir árið 2020. Hægt er að skila inn hugmyndum á netfangið vigdis@eything.is. Áhersluverkefni eru samningsbundin verkefni sem hafa beina skírskotun til sóknaráætlunar landshlutans og styðja við Heimsmarkmið Sameinuðu þjóðanna. [Nánar...]

Vegagerðin býður til morgunverðarfundar um ferðamenn og áningarstaði á þjóðvegum á Grand hótel þann 21. janúar 2020. Fjölgun ferðamanna síðasta áratug hefur verið fordæmalaus. Álagið hefur aukist á innviði landsins, ekki síst vegakerfið sem hefur þurft að anna mun meiri umferð en ráð var fyrir gert. Áskoranir eru margar, til dæmis er mikilvægt að fjölga áningarstöðum á þjóðvegum, bæði til að auka þjónustu við ferðamenn og ekki síst til að auka öryggi vegfarenda.

Bæjarstjórn samþykkti fjárhagsáætlun 2020 og þriggja ára áætlun 2021-2023 við síðari umræðu sem fram fór 13. desember sl. Rekstur bæjarsjóðs Fjallabyggðar stendur traustum fótum. Aðhald og ráðdeild í rekstri skila rekstrarafgangi upp á 257 m.kr. og veltufé frá rekstri upp á 550 mkr. sem gerir bæjarsjóði kleift að hafa hátt framkvæmdarstig og greiða niður vaxtaberandi skuldir um 115 m.kr. á árinu 2020. Á næsta ári er reiknað með að ljúka við stærsta umhverfismál byggðarlagsins, það er að segja holræsaútrásir og dælubrunna í báðum byggðarkjörnum.

Ákveðið hefur verið að fresta þrettándabrennu Kiwanisklúbbsins Skjaldar og flugeldasýningu Björgunarsveitarinnar Stráka sem halda átti mánudaginn 6. janúar kl. 18:00 á Siglufirði. Þetta er gert vegna slæms veðurútlits um komandi helgi og mikillar ofankomuspár á mánudaginn en staðan verður endurmetin þá. Fylgist með!

Vakin er athygli á því að næsti bæjarstjórnarfundur verður miðvikudaginn 22. janúar. Samkvæmt venjubundnum fundartíma bæjarstjórnar, sem er annar miðvikudagur í mánuði, hefði næsti fundur átt að vera í næstu viku, þann 8. janúar en ákveðið hefur verið að færa hann til 22. janúar.

Frá 1. janúar 2020 þurfa íbúar og rekstraraðilar í Fjallabyggð klippikort til að komast inn á gámasvæði sveitarfélagsins. Íbúar og rekstraraðilar geta sótt klippikortin á skrifstofum sveitarfélagsins Gránugötu 24 Siglufirði og Bókasafni Fjallabyggðar á Ólafsvegi 4 Ólafsfirði. Íbúar og sumarhúsaeigendur fá afhent eitt kort á ári sér að kostnaðarlausu en rekstraraðilar þurfa að greiða 29.900 krónur fyrir kortið.