Viðbragðsáætlun Fjallabyggðar við heimsfaraldri

Sem kunnugt er hefur Ríkislögreglustjóri lýst yfir neyðarstigi almannavarna í samráði við sóttvarnalækni vegna kórónaveiru (COVID-19).

Fjallabyggð hefur gefið út viðbragðsáætlun sem er að finna á heimasíðunni undir útgefið efni

Þessi viðbragðsáætlun á að þjóna þeim tilgangi að vera stjórnendum sveitarfélagsins til stuðnings um það hvernig takast eigi á við afleiðingar neyðarástands sem kann að ógna lífi og heilsu almennings, umhverfi og/eða eignum.

Áætlun þessi gildir fyrir sveitarfélagið og stofnanir þess en helstu stofnanir munu setja sér eigin áætlun og útfæra nánar viðbrögð eftir eðli starfsemi hverju sinni. Ábyrgð á viðbragðsáætlun er á höndum viðkomandi yfirmanns stofnunar, deildarstjórum sem og bæjarstjóra. Áætlunin miðast við að starfsemi sveitarfélagsins verði skert og að hluti starfsfólks verði rúmfastur vegna veikinda eða í sóttkví í ákveðinn tíma. Markmið áætlunarinnar eru að tryggja skipulögð og samræmd viðbrögð allra stofnana sveitarfélagsins sem og starfsmanna þess, ásamt því að stuðla að öryggi starfsmanna og lágmarka áhrif inflúensufaraldsins á rekstur sveitarfélagsins.

Við gerð áætlunarinnar er meðal annars stuðst við lög um almannavarnir nr. 82/2008 og lög um sóttvarnir nr. 19/1997. Notast var við fyrirmynd af viðbragðsáætlun Sambands Íslenskra sveitarfélaga og viðbragðsáætlun Eyjafjarðarsveitar.

Viðbragðsáætlun þessi hefur þegar verið virkjuð og viðbragðsteymi bæjarfélagsins hefur tekið til starfa.

Hægt er að skoða viðbragðsáætlunina hér