Í Fjallabyggð er blómlegt menningarlíf á hinum ýmsu sviðum menningarmála. Fjölmörg félagasamtök halda uppi öflugu starfi, hér má finna glæsileg söfn og haldnar eru fjölmennar metnaðarfullar tónlistarhátíðir.
Vakning hefur orðið í safnamálum og friðun gamalla húsa í sveitarfélaginu á undanförnum árum. Þar er flaggskipið hið glæsilega Síldarminjasafn Íslands á Siglufirði, sem er þriðja stærsta safn landsins, á Siglufirði er einnig Þjóðlagasetur sr. Bjarna Þorsteinssonar og í Ólafsfirði er áhugavert Náttúrugripasafn. Fleiri minni söfn og vinnustofur eru í sveitarfélaginu sem gaman er að skoða.
Þær tónlistarhátíðir sem haldnar eru í sveitarfélginu eru kunnar fyrir metnaðarfulla dagská og spanna þær yfir vítt svið. Þar skal fyrst nefna Þjóðlagahátíðina á Siglufirði sem hlaut Eyrarrósina árið 2005 sem áhugaverðasta hátíðin á landsbyggðinni, Blueshátíðin í Ólafsfirði er búin að tryggja sig rækilega í sessi og þar er ávallt líf og fjör, sama má segja um Síldarævintýrið á Siglufirði þar sem heimamenn sjá að mestu um að skemmta gestum með leik og söng en öllu meiri ró er yfir dagskrá Berjadaga, sem haldnir eru hvert haust í Ólafsfirði en þar er sígild tónlist í fyrirrúmi. Óhætt er að mæla með öllum þessum hátíðum fyrir unnendur góðrar tónlistar og fyrir þá sem vilja njóta tilverunnar. Að auki eru haldnir í sveitarfélaginu fjölmargir tónleikar þar sem fram koma jafnt heimamenn sem landsþekktir tónlistarmenn.
Tvö leikfélög eru starfandi í sveitarfélginu, nokkrir kórar og hljómsveitir og fjölmörg félagasamtök sem krydda mannlífið með öflugu starfi.
Menningarnefnd er bæjarstjórn til ráðuneytis um menningartengd málefni. Í nefndinni eru 5 fulltrúar og 5 til vara. Fundar nefndin einu
sinni í mánuði eða eftir þörfum.
Menningarfulltrúi hefur yfirumsjón með málaflokknum
